Komandante Unidade Polisia Militár, Majór Abel da Costa Xavier "NIKI". Imajen/Eugénio Pereira

DILI, 22 jullu 2019 (TATOLI)-Komandu Polisia Militár (PM) FALINTIL-Forsa Defeza Timor-Leste (F-DTL) simu ona konvite husi Governu Timor-Leste atu fó seguransa ba xefe estadu husi nasaun 10 ne’ebé sei mai partisipa iha festa Konsulta Populár ba dala 20 (30 Agostu 1999-2019) ho Festa Forsa Manutensaun Pás mai Timor-Leste INTERFET-sigla Inglés).

Komandante Unidade Polisia Militár, Majór Abel da Costa Xavier “NIKI” dehan, husi konvite xefe estadu 10 ne’ebé sei mai Timor-Leste, na’in lima konfirmadu ona no na’in lima sei hein konfirmasaun husi parte komisaun organizadora.

Majór NIKI esplika, Polisia Militár mós prepara ona númeru forsa, karreta materiál militár nian ne’ebé sei uza hodi fó seguransa ba bainaka internasionál sira koopera ho Komandu PNTL

“Polisia Militár iha ona karta operasaun hodi  haree loos de’it mak xefe estadu husi nasaun rai li’ur ne’ebé pozitivu atu mai ne’e iha xefe estadu nasaun lima (5), konfirma ona, no xefe estadu lima (5) seidauk konfirmadu,” informa Komandante Unidade Polisia Militár, Majór Abel da Costa Xavier “NIKI”, ohin,  ba Ajénsia TATOLI iha nia knaar fatin, Komandu Polisia Militár, Quintal Boot, Dili.

 Kona-ba totál númeru ne’ebé sei koloka, Majór NIKI dehan, ne’e segredu militár nian no importante liu maka Polisia Militár iha preparasaun no sei koopera no polisia.

Majór NIKI apela mós autoridade lokál inklui juventude hotu- hotu no povu sira atu asegura seguransa hodi simu bainaka internasionál sira nia vizita bele iha nafatin dame too serimónia remata.

“Garantia seguransa ne’e labele haree ba militár no polisia de’it, maibé ita Timoroan  tomak hamutuk mak bele garantia pás ne’e,” Majór NIKI hateten.

 Jornalista    : Eugénio Pereira

Editór           : Francisco Simões

HAKEREK NO HATÁN

Please enter your comment!
Please enter your name here