Suspeitu sira ne'ebé taa membru F-FDTL iha Pantai Kelapa, Estasaun Kombustivel Nagajor nia oin. Imajen/Domingos Piedade Freitas

DILI, 22 jullu 2019 (TATOLI) -Defeza ba arguido na’in lima (5) ne’ebé deskonfia taa membru FALINTIL-Forsa Defeza Timor-Leste (PNTL) sei halo rekursu ba Tribunal Rekursu no sei estrai sertidaun hasoru Polisia Militár (PM)  tanba detein fali nia kliente hanesan ema sivíl iha sela militár.

Defensor Públiku, Estaquio Guterres.

“Ha’u hato’o ona ba tribunál katak sei estrai sertidaun ba membru forsa  sira ne’ebé detein sira na’in lima, ne’ebé tuir loloos sira tenke ba de’it iha sela PNTL nian la’ós ba fali sela militár nian,” afirma Defensor arguido na’in lima nian, Estaquio Guterres, ba Jornalista sira iha Tribunal Distritál Dili (TDD), foin lalais ne’e.

Ho razaun nee mak Defeza Estaquio Guterres,  mosu hanoin katak tenke halo duni rekursu ba Tribunal Rekursu, hasai mós sertidaun investigasaun ba membru Polisia Militár  sira ne’ebé momentu halo detensaun ba arguido na’in lima iha sela militár nia fatin.

Defensor Públiku, Estaquio Guterres, la simu atuasaun detensaun ba nia kliente na’in lima, ne’ebé antes hatete dehan deskonfia taa Membru forsa na’in ida ne’ebé tenke lori kedas arguido sira hodi detein iha sala detensaun Polisia Militar nian.

Nu’udar Defeza Estaquio Guterres, konsidera la’ós militár mak tenke detein fali iha sela militár, tanba tuir loloos tenke ba detein iha sela Polisia Nasionál Timor-Leste (PNTL) sira nia fatin.

Komandante Unidade Polisia Militár, Majór Abel da Costa Xavier “NIKI”. Imajen/Eugénio Pereira

Ba kestaun ne’e Komandante Polisia Militár, Majór Abel da Costa Xavier “NIKI”, afirma katak, nia prontu atu ko’alia hasoru Defensor Estaquio Guterres.

“Tanbasá ha’u nia membru kaer ema hirak nee, hodi halo torturasaun.  Mai ko’alia ho ha’u no aprezenta faktu, la’ós kritika de’it iha Tribunal ne’ebá,” afirma Komandante NIKI.

Komandante NIKI friza katak asaun ne’ebé nia membru halo tanba orientasaun husi komandu, tanba ne’e,  nia parte prontu atu hasoru malu ho Estaquio Guterres iha ne’ebé no bainhira de’it.

Nia hatutan, se Estaquio Guterres hatene lei ho loloos, bele ba ko’alia direita ho Xefe Estado Maiór FALINTIL-Forsa Defeza Timor-Leste, Majór Jenerál Lere Anan Timur.

Komandante NIKI hateten, so iha Timor de’it mak joven sira tula liman, ain no baku forsa polisia no forsa armada. Maibé, kuandu halo nafatin ba forsa maka Polisia Militár  sei ba kaer iha uma.

“Atu lei mak ko’alia direitu umanus too iha ne’ebé no too rihun ba rihun mós, kuandu baku forsa ba kaer no sulan sira,” hateten Komandante NIKI.

“Agora, ema taa ha’u nia tropa too hasan kuak no kanek boot, nehan monu, nanál kanek hotu, hein mandadu kona ba saida nian,” Komandante NIKI.

Iha audiénsia julgamentu, foin lalais ne’e, TDD  aplika prizaun preventiva ba arguido na’in CB no na’in haat seluk hetan Termu Identidade Rezidénsia (TIR) ho medida koasaun aprezentasaun periódika semana ida dala ida iha Polisia sira nia fatin.

Iha primeiru julgamentu iha tribunál provas faktu ba arguido CB,  katak nia iha duni indísiu forte ne’ebé deskonfia katak arguido CB envolve duni krime tentativa Omisídiu no Arma Branka hasoru vitima membru F-FDTL, Abílio Babo, iha área estrada parte Estasaun Kombustivel Nagarjo nian, Bebonuk, Dili, domingu (14/07/2019), tuku 8:00 kalan.

Notísia Relevante : Domingu kalan, Grupu Ilegál Taa Kanek Forsa Espesiál F-FDTL Ida

Taa Membru F-FDTL, CB Tama Prizaun Preventiva no Na’in Haat Hetan TIR

Jornalista : Domingos Piedade Freitas

Editór       : Francisco Simões

 

HAKEREK NO HATÁN

Please enter your comment!
Please enter your name here