Negosiadór Prinsipál, Xanana Gusmão ho ninia ekipa bainhira halo audisaun konjunta ho Komisaun B, C no D ho Governu, iha plenária Parlamentu Nasionál, tersa (16/7). Imajen Tatoli/Jogerjo Guterres

DILI, 22 jullu 2019 (TATOLI)—Prezidente Komisaun D ne’ebé trata asuntu Ekonomia no Dezenvolvimentu, Virgínia Ana Belo informa Komisaun C no D konklui ona Proposta Pakote Lejizlativa, ne’ebé kompostu husi Proposta Lei Haat no Rezolusaun ida, tanba ne’e tersa aban (23/7), sei halo diskusaun no aprovasaun iha finál globál.

“Lei Atividade Petrolífera no Lei Rejime Laborál ho Migratóriu ninian, ohin Komisaun konsege aprova ninia relatóriu pareser no sei manda ba meza Parlamentu ninian, no aban tama iha diskusaun finál globál,” tenik Virgínia iha resintu Parlamentu Nasionál (PN), segunda ne’e.

Proposta Lei Rejime Laborál arovadu iha espesialidade ho votu a-favór 6, kontra 3 no abstensaun 0, no lei ne’e trata espesífiku ba traballadór timoroan iha kampu Bayu-Undan.

“Kuandu operasaun iha kampu Bayu-Undan hotu rejime tuan la prevalese, uluk ita hamutuk ho Austrália no agora ita ketak. Ba vistu mós hanesan. Vistu ba traballadór estranjeiru tenke espesífiku uituan,” dehan deputada bankada CNRT ne’e.

Sorin seluk, Prezidente Parlamentu Nasionál (PPN), Arão Noé de Jesus da Costa Amaral, informa Proposta Pakote Lejizlativa ba Ratifikasaun Tratadu Fronteira Marítima Timor-Leste no Austrália aprovadu hotu ona iha espesialidade.

“Aban, bainrua ka kle’ur liu loron 25 bele haruka ba Prezidente Repúblika. Ida ne’e mak ami-nia previzaun. Tanba Komisaun sira aselera no konklui ona, entaun Parlamentu sei enkamiña ba Prezidente Repúblika,” dehan Arão.

Pakote Lejizlativa kompostu husi lei haat mak hanesan Lei Atividade Petrífera, Lei Fundu Petrolífera, Lei Tributária, Rejime Laborál no Migratóriu Espesiál no proposta rezolusaun kona-ba tratadu entre Timor-Leste ho Austrália, ne’ebé  estabelese Respetiva Fronteira Marítima iha Tasi Timor.

Proposta lei númeru 4/V-segunda alterasaun númeru 13/2005, 2 setembru kona-ba Lei Fundu Petrolífera, aprovadu iha jeneralidade ho votu a-favór 40, kontra 23, no abstensaun 1.

Proposta lei númeru 5/V-segunda alterasaun lei númeru 9/2005, 3 agostu, kona-ba Lei Fundu Petrolífera, aprova ho votu a-favór 40, kontra 23, no abstensaun 1.

Enkuantu, proposta lei númeru 6/V-primeira alterasaun lei númeru 8/2008, 30 juñu (Lei Tributária), primeira alterasaun lei númeru 3/2003, 1 jullu, kona-ba Dezenvolvimentu Petróleu iha Tasi Timor (Estabilidade Tributária), aprova ho votu a-favór 41, kontra 23, no abstensaun 0.

Nune’e mós proposta lei númeru 7/V kona-ba laborál no Migratóriu Espesiál Aplikável ba Projetu Bayu Undan, aprova ho votu a-favór 42, kontra 23, no abstensaun 0.

Jornalista: Evaristo Soares Martins

Editór: Xisto Freitas

Notísia Relevante:

PN Aprova Alterasaun Lei Fundu Petrolífera no Atividade Petrolífera iha Espesialidade

HAKEREK NO HATÁN

Please enter your comment!
Please enter your name here