Hadau malu bola entre jogadór Boavista no SLB. Imajen Mídia LFA

DILI, 21 jullu 2019 (TATOLI)—Klube AD SLB Laulara fahe pontu ho nia adversáriu Boavista FC Timor tanba impata 3-3 iha jogu kontinuasaun Primeira Divizaun Liga Futeból Amadora (LFA) époka 2019 ne’ebé hala’o iha Estádiu Munisipál Dili, ohin lorokraik.

Hosi rezultadu ne’ebé klube rua ne’e hetan, hatuur nafatin ekipa rua iha zona seguru iha tabela klasifikasaun provizória.

Golu SLB prodúz hosi Mouziho de Lima iha minutu 34, 48 no Aldo Amaral iha minutu 40. Enkuantu golu Boavista hatama hosi António Alcantra iha segundu (detik) 42, auto golu jogadór SLB, Bakayoko iha minutu 45+1 no Henrique Martins iha minutu 87.

Hafoin jogu ramata, asistente treinadór SLB, José Fonseca, hateten mehi SLB nian hakarak manán hodi hadau pontu tolu maibé la konsege.

“Ami ohin ne’e hakarak loos manán. Ami lidera uluk ona 3-2 maibé iha minutu besik termina ona mak jogadór sira ladún kontrola bola ho di’ak, Boavista halo tiha golu,” tenik Fonseca.

Iha sorin seluk, Treinadór Boavista, Fabiano José Flora konfesa katak sira mós iha hanoin hakarak loos hadau pontu tolu maibé la konsege.

“Ha’u halo estratéjia oioin atu manán iha jogu ne’e maibé labele. Laiha buat ida. Jogu tuir mai ha’u hanoin ami sei hadi’a para manán,” dehan treinadór portugés ne’e.

Jornalista: Hortencio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here