Isílio Coelho. Foto espesiál

DILI, 20 jullu 2019 (TATOLI)—Always walk through life as if you have something new to learn and you will —Hala’o beibeik moris ne’e atu-hanesan ita-boot iha buat ruma ne’ebé foun atu aprende no ita-boot sei halo ida ne’e (Vernon Howard).

“Querer é Poder” sai hanesan xave “lalehan” [importante] ba Isílio de Fatima António da Silva Coelho atu loke odamatan-boot susesu no janela esperansa nian be ninin no rohan laek. Tanba, iha ninia moris tomak, liafuan “Querer é Poder” sai hanesan lema ba nia hodi sente katak hala´o moris ne’e sempre hetan buat foun ne’ebé nia aprende beibeik husi moris ne’e rasik. Moris ne’e nu’udar prosesu aprendijazen ida ne’ebé suli hanesan wee-mota. Suli la maran no suli beibeik.

Ba Isílio, la’ós hakarak de’it ita bele maibé tenkeser hatene saida maka ita halo para buat ne’e bele akontese. Atu “hatene hodi hakarak” no “hakarak hodi hatene” tenke presiza no liuhusi organizasaun, disiplina no dedikasaun. Ida ne’e hanesan xave ka baze ba susesu, ba buat ne’ebé ita halo. Tanba, nia onestu, husi eskola to’o serbisu hanesan ne’e buat ne’ebé ó halo sempre liu husi disiplinadu, organizadu, dedikadu.

“Bele hakarak buat hotu se ó laiha dedikasaun, laiha disiplina, se la konsege organiza, ha’u laduun fiar katak ó sei la bele konsege. Maibé se ó hakarak buat ida, ó disiplina án bá, organiza án, ba ha’u sente ó bele,” dehan Isílio de Fatima António da Silva Coelho ne’ebé moris iha Hatu’udu-Ainaro [uluk tama ba Same] iha 29 Setembru 1968 ne’e ba Ajénsia TATOLI ho neon tomak, foin lalais ne´e.

Karreira

Nia lakoi no nunka atu bosok. Liuhusi envolve-án iha organizasaun, disiplina no dedikasaun ba nasaun ho fuan domin sei bele kontribui ba dezenvolvientu nasionál. Iha Agostu 2000, Isílio hahú ninia karreira hodi kandidata nia-án sai diplomata ba Ministériu Negósiu Estranjeiru no Kooperasaun tuir konkursu ba ministériu.

Nia admitidu iha janeiru to’o marsu halo parte ba primeiru grupu diplomata sira ne’ebé hetan oportunidade atu halo formasaun iha Institutu Diplomátiku Portugál nian. Nia tuir formasaun iha Portugal kuaze fulan tolu. Hafoin iha 16 abril 2001, nia efetivamente hahú serbisu iha  Ministériu Negósiu Estranjeiru no Kooperasaun Timor-Leste.

“Iha momentu ne’ebá, ha’u kaer kargu hanesan Diretór Protokolu ba Relasaun Públika. Iha altura ne’ebá komesa ho ami-na’in haat. Ha’u ho Funsionáriu UN (United Nation) na’in rua no Laureadu Prémiu Nobel da Paz, José Ramos Horta, mak nu’udar Ministru Negósiu Estranjeiru no Kooperasaun Timor-Leste,” dehan Isílio Coelho ne’ebé akaba eskola iha Eskola Primária, Pre-Primária no Eskola Sekundária Esternatu São Jose, Dili, ne’e.

Nia mantein iha diresaun protokolu ne’e to’o 2003 maka hetan kolokasaun hanesan Konsileiru iha Embaixada Timor-Leste iha Lisboa-Portugal. Iha ne’eba nia hetan fali instrusaun atu ba loke embaixada iha Cuba. Hafoin ne’e, nia simu fila fali instrusaun hodi ba loke fali embaixada iha Vatikanu iha Roma. Iha Roma, nia hanesan konselleiru no enkaregadu Ministru Negósiu Estranjeiru interinu to’o Embaixadór husi Timor-Leste eleitu mak nia fila husi Roma ba Portugál.

“Momentu markante liu ba ha’u-nia kareira mak kuandu ha’u komesa serbisu iha MNEK no asume kargu hanesan Diretór Protokolu iha Relasõens públikas hahú iha tinan 2001-2002, ita prepara ona tranzisaun governu husi Administrasaun Nasõens Unidas ba Timor-Leste. Altura ne’ebá, asume responsabilidade hanesan Diretor do Protocolo do Estado no serbisu hamutuk ho Eis Ministru Protokolu Nasõens Unidas naran Gamaliel hanesan Counterpart, organiza hamutuk serimónia transizaun ne’e hodi foka liu ba protokolu de’it,” nia haktuir.

Iha biban ne’ebá, nia foin mak tama ba idade 32 ou 33, idade nurak ne’ebé  laduun iha esperiénsia barak atu hala’o knaar hirak ne’e. Maibé, tanba nia hetan responsabilidade boot entaun nia tenta aprende no kontribui ba serbisu no organizasaun ida ne’e. Nia fiar katak organizasaun  ne’e la la’o perfeitu maibé bele la’o di’ak tuir ita-nia kondisaun iha biban ne’ebá.

“Momentu markante ida tan maka iha 21 maiu 2001, hafoin tranzisaun iha mós tomada de pose ba Primeiru Governu Konstitusionál Timor-Leste. Ha’u sente ida ne’e oportunidade unika iha situasaun ne’ebá ho idade natoon, ho esperiénsia menus maibé konsege organiza eventu sira hanesan ne’e ho dignidade. Ida ne’e, ha’u sente momentu markante tebes ba ha’u-nia esperiénsia ou vida profesionál iha MNEK Timor-Leste nian,” nia hateten.

“Iha altura ne’ebé kuandu foin halo tranzisaun, ita asume kargu diresaun, buat hotu foun. Laiha tradisaun koñesimentu. Esperiénsia mós laiha. Dalaruma ita-nia parseiru sira fó ba ita la kompletu, nune’e ita tenta monta ita-nia sistema no mekanizmu no polítika jestaun sira ne’e husi zero. Entaun, ha’u sente ida ne’e hanesan kompetisaun di’ak ida ba timoroan sira ne’ebé uluk iha pozisaun sira hanesan ne’e,” dehan oan husi Aman-inan, Adelino da Silva (Ossu) no Julmira Celestina Faria Coelho (Venilale) ne’e ho fiar-án.

Nia haktuir, hafoin koloka nia iha ita-nia embaixada Vatikanu-Roma hanesan konsileiru no enkaregadu ministru negósiu estranjeiru no kooperasaun, nia fila fali mai Timor-Leste hodi asume kargu hanesan Diretór Bilaterais hafoin sa’e fila fali ba Diretór Jerál Relasoens Internas. Iha momentu ne’ebá ne’e, estrutura iha rua mak ida administrasaun no bilaterál.

Husi kargu Diretór Jerál Relasoens Internas maka nia hetan fali fiar sai hanesan Embaixadór Timór nian ba Japaun durante tinan haat ho balun. Hafoin liu tiha tinan haat, iha 2015, nia fila haknaar-án iha MNEK. Iha tinan 2016, nia asumi kargu nu’udar Sekretáriu Jerál no Asuntu Bilaterál sai ba kolokasaun. Pozisaun rua ne’e, nia asumi hahú husi 2016 to’o ohin loron (2019).

Nia esplika, tuir lei organika MNEK nian atu asume kargu hanesan Diretór Jerál no Sekretáriu Jerál tenke iha nivél embaixadór. Iha altura ne’ebá seidauk iha kandidatu entaun nia asume responsabilidade hanesan sai Sekretáriadu husi marsu 2016 to’o tiha fali iha setembru 2017.

“Durante asume kargu hanesan Sekretáriu Jerál, ha’u sente obras konkreta maka husik hela ba kotuk hanesan serbisu husi tékniku ho intervensaun husi Diretór seluk nian, ami konsege iha 2016 lori ba aprovasaun no promulgasaun ami-nia estatutu kareira diplomátika. Estatutu Kareira Diplomatíka ne’e iha Ministériu Negosiu Estranjeiru rai hotu iha. Iha Portugal hanaran  estatutu de karismátika. Husi estatutu karismátika ne’e maka bolu réjime transitóriu,” nia tenik.

Tanba ne’e, iha dekretu lei ida atu regulariza estasaun profisionál ba funsionáriu hamutuk 254 ne’ebé MNEK iha. Ida ne’e maka nia sente hanesan rezultadu ida husi esforsu ekipa tomak MNEK nian. Iha  altura hanesan Sekretáriu Jerál ne’e, nia hetan responsabilidade no kompeténsia hodi koordena prosesu sira ne’e hotu. Tékniku labele halo sein intensaun husi polítika sira ne’e.  Sira-nia ekipa konsege finaliza duni buat rua ne’e, nune’e iha tinan 2016 no 2017 hodi ba rejime tranzitóriu.

“Hanesan funsionáriu seniór ba ministériu ne’e, ha’u sente, ami lori memória konstitusionál barak husi zero to’o ohin loron. Iha buat barak ami halo no pesoalmente tenta kontribui maibé ita haree katak sei falta buat barak. Ezemplu, hanesan rejimentu interna ko’alia kona-ba prosedimentus  hanesan administrativu sei la’o hela, seidauk kompletu. Maibé, ami halo hela buat ne’ebé ami bele halo para kontribui ba profisionalizasaun institutu ninian. La’ós serbisu ne’ebé ita presiza atu fornese ba públiku. No, buat sira ne’e hotu orientasaun mai husi ministru sira,” nia dehan.

Dezafiu

Maske Isílio bele kaer xave lalehan “Querer é Poder” hodi loke odamatan susesu maibé iha dezafiu lubun ne’ebé satán netik nia hakat. Moris ne’e moris duni no suli hanesan bee maibé bee be suli sempre mout tutuir iha dalan klaran, wainhira to’o iha ninia alvu. Iha ninia karreira serbisu profesionál, bee wa’in maran tutuir dalan [hetan dezafiu] maibé nia sente la duun problema tanba nia hasai lisensiatura ba ida ne’e.

“Dezafiu iha nível profesionál laduun iha. Tanba ha’u-nia lisensiatura, ha’u foti siénsia polítika no relasaun internasionál. Tanba ne’e, serbisu iha MNEK maka ne’e duni. Ha’u-nia formasaun iha língua Portugés no husi língua Portugés, ha’u bele aprende língua inglés. Ha’u sente iha nivél profesionál, ha’u laduun hetan dezafiu,” dehan Isilio ne’ebé foti Siénsia Politíka no Relasaun Internasional iha Universidade Nova de Lisboa-Portugal (1990) no foti Mestradu iha Seguransa Internasionál no Governasaun Global iha Universidade Londres.

Dezafiu bo’ot ne’ebé nia hasoru wainhira sei labarik, nia haktuir, maka iha tinan 1976 halai ba ailaran. Dezafiu boot tebes tanba nia para tiha ninia estudu (eskola). Pois sai husi rai ida ba rai ida seluk, moris iha matebian leten susar hanesan be laiha, alimentasaun difísil.

“Imajen ida iha ha’u-nia ulun ne’e maka iha señora ida ema hakoi tiha, nia ulun de’it maka sai. Nune’e ha’u husu ba sira; Tanbasá mak señora ne’e hamrik hanesan ne’e? Sira hatán; ‘Nia ain aat la’o la di’ak. Tanba ne’e, nia maka husu para família tau hanesan ne’e para seluk ba rende. Hafoin ne’e ami tun mai matebian hun, iha loraik ida, sira tau labarik feto sira ne’e halo hamutuk, pois sira lori joven sira kaer ne’e mai sona. Só buat rua ne’e maka iha hela ha’u-nia ulun, to’o agora ha’u la haluha,” nia konta tuir.

Edukasaun Naun-formál

Iha tinan 2001 mai leten, iha MNEK iha ona programa ba formasaun barak maka parseiru sira bilaterál oferese. Formasaun ne’ebé nia tuir mak formasaun hanesan estájiu profesionál iha MNEK Austrália iha Cambera City, formasaun kona-ba Diplomásia Protokolu no Asuntu Konsulares iha Departamentu Estadu Negósiu ne’ebé Amérikanu sira maka oferese (novembru to’o dezembru 2001).

Segunda faze no terseira faze mós kona-ba matéria hanesan Formasaun kona-ba Diplomasia Protokolo no Asuntu Konsulares  ida hala’o iha Eskola diplomátika Madrid Espanha no ida terseira iha MNEK Suisa (swiss) nian, ne’ebé  hala’o husi universidade Upsala (janeiru- fevereiru tinan  2002).

Formasaun ida seluk iha Fransa iha Eskola Nasionál Administrasaun ne’ebé di’ak tebes. Formasaun  ne’e atu reforsa liután koñesimentu ne’ebé nia iha no formasaun ne’e hanesan formasaun ba nível seniór ona.

Jornalista: Nelia Rosario

Editór      : Rafy Belo

HAKEREK NO HATÁN

Please enter your comment!
Please enter your name here