Kontra-atake entre jogadór Altético Ultramar no Académica FC. Imajen Tatoli/Hortençio Sanchez

DILI, 20 jullu 2019 (TATOLI)—Klube Atlético Ultramar impata 1-1 ho armada Académica FC iha jogu kontinuasaun Primeira Divizaun Liga Futeból Amadora (LFA) époka 2019 ne’ebé hala’o iha Estádiu Minisipál Dili, ohin lorokraik.

Hosi rezultadu ne’ebé Ultramar hetan, lori ekipa refere mantein nafatin iha zona seguru ho pontu 7. Enkuantu, Académica kontinua mantein iha liña mean (zona dezpromosaun) ho pontu 4.

Golu Ultramar prodúz hosi jogadór Glaco Trajano iha minutu 65. Golu Académica nian marka hosi Francisco Sávio iha minutu 16.

Jogu refere dirije hosi árbitru Nívio Fernandes, juiz liña Filomeno da Silva, Elísio Lopez no árbitru rezerva, Cristovão Alves.

Fó hanoin fali, dadaun ne’e tabela klasifikasaun provizória lidera hosi Lalenok FC ho pontu 13, segundu lugár AS Ponta Leste ho pontu 12, terseiru lugár Boavista ho pontu 10, kuartu lugár AD SLB ho pontu 8, kintu lugár Assalam ho pontu 8 (SLB ho Assalam pontu hanesan maibé diferente golu), sestu lugár Ultramar ho pontu 7, sétimu lugár Académica ho pontu 4 no oitavu lugár Karketu Dili ho pontu 2.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here