Ekipa Voleiból Feto AD SLB ne’ebé sai kampiaun iha Tasa ADR União. Imajen Tatoli/Hortençio Sanchez

DILI, 20 jullu 2019 (TATOLI)—Ekipa Feto AD SLB halakon adversáriu Académica ho rezultadu 3-1 iha jogu finál voleiból Tasa ADR União ne’ebé hala’o iha Jináziu Dili, sábadu (20/7).

Vitória ne’ebé SLB gaña lori ekipa refere sai hanesan primeiru lugár Tasa ADR União époka ida ne’e. Iha jogu parte dahuluk, Académica halo jogu ne’ebé kapa’as hodi liki nia adversáriu SLB ho rezultadu 1-0 liuhusi set 25 kontra 20.

Hakat ba parte segundu, SLB halo mudansa estratéjia hodi lansa kontra-atake ne’ebé maka’as hodi muda rezultadu impata 1-1 iha  set 25 kontra 13. Hakat ba parte terseira, SLB nafatin domina bola hodi muda tan rezultadu ba 2-1 liuhusi set 25 kontra 14.

Iha parte ikus liu, Académica haforsa-án maka’as atu muda rezultadu sai impata maibé la konsege tanba SLB hala’o jogu ne’ebé maka’as hodi la fó fatin ba Académica no ikus SLB mak sai duni kampiaun ho rezultadu 3-1 liuhusi set 25 kontra 16.

Entretantu, manán na’in sira sei simu prémiu bainhira selebra aniversáriu ADR União ne’ebé sei realiza iha tempu besik no parte União seidauk fó sai prémiu saida mak atu entrega ba klube hirak ne’ebé kampiaun.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here