DILI, 20 jullu 2019 TATOLI—Família haloot ona mate-isin Joao Bosco Batista Colo Batan iha Semitériu Kiu-tó’kô Masin, Suku Kosta, Sub Rejiaun Pante Makassar, Rejiaun Administrativa Espesiál Oé-Cusse Ambeno (RAEOA), sábadu (20/7).
Antes haloot, família sei realiza misa fúnebre iha tuku 15:00 otl, iha kapela Nossa Senhora Maria Gorreti Masin, ne’ebé prezide hosi Vigáriu Parokiál, Parókia Nossa Senhora do Rosário de Oé-Cusse, Pe. Cirilo dos Santos.
Hafoin misa, família akompaña mate-isin halo prosesaun no reza tersu to’o iha semitériu iha tuku 17:00 otl.
Reprezentante família, Gastão Poto via telefónema ba TATOLI, sábadu ne’e, hateten prosesu funerál ba mate-isin Bosco la’o ho hakmatek tanba hetan seguransa másimu hosi Polísia Nasionál Timor-Leste (PNTL) Rejiaun Administrativa Espesiál Oé-Cusse Ambeno (RAEOA).
Gastão ezije ba governu Timor-Leste atu serbisu hamutuk ho Governu Indonézia hodi aselera prosesu buka tuir autór ba kazu asasinatu ne’e, nune’e bele submete ba justisa.
Ezijénsia ne’e fó sai tanba Gastão konsidera vida ne’e úniku. Maromak de’it mak bele hasai, la’ós ema mak determina.
Hanesan família, Gastão sente lakon tanba Bosco hanesan fini di’ak ba família ne’ebé família fó fiar hodi haruka nia eskola iha parte aviasaun nian ne’ebé tuir loloos nia bele fó kontribuisaun ba nasaun iha futuru. Maibé, ema makerek sira habadak Bosco nia vida, tan ne’e Bosco labele ramata nia estudu tuir buat ne’ebé família espera.
Kona-ba prosesu tuir mai, nia hateten, família sei túr hamutuk atu planeia hodi halo tuir kultura Atoni, to’o koremetan. Joao Bosco Batista Colo Batan, hanesan oan datoluk hosi maun alin na’in neen—feto rua, mane haat. Bosco nia aman naran Constâncio Suni no inan naran Regina Ola.
Jornalista: Cipriano Colo
Editór: Xisto Freitas