Atividade iha Jináziu Dili. Imajen TATOLI/Hortençio Sanchez

DILI, 20 jullu 2019 (TATOLI)—Klube voleiból mane Choque sai vensedór ba Tasa ADR União hafoin halakon AD SLB Laulara ho rezultadu 3-1 iha jogu ne’ebé hala’o iha jináziu Dili, sábadu (20/7).

Iha parte primeira, ekipa Choque dere SLB ho rezultadu 1-0 liuhusi set 27 kontra 24. Hakat ba parte segunda, SLB esforsu hodi hatuur rezultadu ba 1-1 hosi set 25 kontra 15. Iha parte terseira, Choque halakon fali SLB ho rezultadu 2-1 hosi set 25 kontra 19.

Jogu manas liu-tan iha parte terseira. Ekipa rua esforsa-án maka’as. SLB buka atu halo impata no Choque buka atu manán. Haree ba espíritu kontra-atake Choque nian la’o ho rítmu ne’ebé maka’as, konsege halakon SLB ho rezultadu 3-1 hosi set 25 kontra 22.

Hosi rezultadu ne’ebé Choque gaña, lori ekipa refere sai hanesan vensedór voleiból Tasa ADR União ba époka ida ne’e.

Prémiu ba manán na’in sira sei entrega bainhira selebra aniversáriu ADR União ne’ebé sei hala’o iha tempu besik no parte ADR União seidauk anúnsia prémiu saida mak atu atribui ba klube hirak ne’ebé kampiaun.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here