Prezidente Rede Feto, Judite Dias Ximenes. Imajen/Osoria A.Marques

DILI, 20 jullu 2019 (TATOLI)-“Badinas, esforsu, disiplina no fiar an”.  Sai hanesan fundasaun ida forte tebes  iha   inan feton Judite Dias Ximenes nia vida.

Rede Feto halo enkontru ho parseiru nasionál iha salaun Fundasaun Alola, Dili, Tersa (09/07/2019). Imajen/Osoria A. Marques

Hosi “badinas, esforsu, disiplina no fiar an” lori  Judite Dias Ximenes, hetan esperiénsia murak iha moris bainhira simu kna’ar husi  partidu FRETILIN iha tinan 2002 hodi reprezenta povu iha Uma Fukun Asembleia Konstituinte hodi diskute no kontribui ba elaborasaun ezbosu Konstituisaun Repúblika Demokrátika Timor-Leste to’o faze aprovasaun no promulgasaun husi Prezidente Repúblika atual ne’ebá “Komandante Em Xefe das FALINTIL, Kay Rala Xanana Gusmão.

Durante tinan ida tuur iha uma fukun Asembleia Konsistente, Judite Dias Ximenes, mezmu ladún vokál  hanesan membru Asembleia Konstituinte sira seluk, maibé nia hatudu ninia kbiit hanesan “Buibere” potensiál hodi kontribui ba prosesu elaborasaun Konstituisaun no ezbosu Lei sira seluk ne’ebé mak urjénsia no pertinente atu aprova ba asegura lala’ok Timor-Leste hanesan nasaun “direitu no demokrátiku”.

Iha era Asembleia Konstituinte, Judite Ximenes, hakarak ka lakohi, nia tenke tuur hanesan ho lider polítiku sira seluk ne’ebé fenomenál,  hanesan Francisco Guterres “Lu Olo”, nu’udar Prezidente Asembleia Konstituinte, Saudozu Francisco Xavier do Amaral, husi Bankada ASDT, Matebian Mário Viegas Carrascalão husi Bankada PSD, Matebian João Carrascalão (Bankada UDT), Saudozu Fernando La Sama de Araújo (Bankada PD), no membru Asembleia Konstituinte sira seluk tan ho total membru Asembleia Konstituinte na’in 88.

“Iha momentu ne’ebá, ha’u hanesan sekretária ba meza prezidénsia  Asembleia Konstituinte to’o transforma ba Parlamentu Nasionál. Esperiénsia ne’e fundamenta liu tan ha’u nia vontade atu aprende nu’udar ‘bukae’ ba ha’u iha ha’u nia vida moris,” hateten Judite Dias  Ximenes, foin lalais ne’e.

Ho abilidade natoon iha komunikasaun polítika, tempu ne’ebá Distintu Deputadu sira aposta konfiansa total ba Judite Dias Ximenes, hodi  nomeia nia nu’udar primeiru Prezidente ba  Grupu Muller Parlamentár Timor-Leste (GMPTL).

Remata mandatu iha Asembleia Konstituinte, organizasaun Popular Feto Timor (OPMT-sigla portugés)  delega konfiansa nafatin ba Judite Dias Ximenes, ba iha Organizasaun Rede Feto no sai hanesan Prezidente ba Rede Feto Timor-Leste.

“Buat ne’ebé sai hanesan orgullu boot ba ha’u iha ha’u nia vida tomak mak liuhosi Asembleia Konstituinte, ami produz Lei Inan hosi preámbulu  to’o produz lejizlasaun sira ne’ebé importante no fundamenta ba ita nia rain hanesan nasaun  Soberanu,” hateten Judite ne’ebé remata nia estudu iha Universitáriu ida iha Bali-Indonézia iha tinan 1996.

Iha organizasaun Rede Feto, Judite Dias Ximenes, servisu voluntariamente no ajudu balun ne’ebé doador nasionál ho internasionál sira fó Rede Feto, Judite ho nia kolega ira iha Rede Feto maneja hodi tulun fali ba inan feton sira seluk ne’ebé vulneravel no kria programa kapasitasaun ba inan feton sira.

Judite Dias Ximenes, dahuluk hala’o nia esperiénsia  lee leitura iha igreja, bainhira ho idade tinan sai (9) no envolve an mós iha atividade PRAMUKA no koru eskola nian.

Bainhira akaba tiha nia estudu iha ensinu sekundáriu nian no kontinua halo estudu ba universidade ida iha Bali entaun iha momentu ne’ebá  nia mós komesa halo diskusaun ka debate makaas tanba nia tama ona iha grupu balu  hanesan diskusaun polítika, depois iha universidade Bali ne’e mós hala’o diskusaun atividade ida iha organizasaun TATOLI Bali nian .

“Entaun ho posibilidade ne’ebé mak iha, ha’u servisu iha CARITAS TL, iha memento ne’e CARITAS Baucau ho Dili seidauk iha, depois ami servisu tiha mak hafoin loke tan CARITAS Baucau ho Dili. Entaun sira foti ona ha’u nu’udar koordenadora ba programa maibé uluk ne’e feto ladún partisipa ba atividade ida hanesan ne’e. kuandu ha’u sai koordenadora ba programa, komesa hanoin oinsá mak bele trasa programa no halo relatóriu ba programa hotu no mós halo diskusaun entre membru sira, ho ida ne’e aumenta liu tan ha’u-nia abilidade hodi bele kapasita an iha dezenvolvimentu,” tenik Judite Dias Ximenes.

Agora iha organizasaun Rede Feto, Judite Dias Ximenes, konsentra ba ezekusaun Planu Estratéjiku no Vizaun Rede Feto nian  atu oinsá feto Timor-Leste livre husi diskriminasaun oioin, atu nune’e feto Timor-Leste bele dezenvolve-an iha iklima igualdade, no bele partisipa ho kontribui ba dezenvolvimentu global.

Rede Feto hanesan organizasaun feto 24 ne’ebé servisu ba feto nia interese. Organizasaun ne’e  harii iha loron 10  Marsu 2000 perante 1° Kongresu Nasionál Feto Timor-Leste.  Rede servisu atu hasa’e no haforsa kapasidade membru iha organizasaun no advokasia atu sira bele hadi’a estutu feto nian iha partisipasaun ba prosesu dezenvolvimentu nasionál.

Rede Feto mós hala’o advokasia ba Direitu Feto no asuntu Jéneru. Iha 1° Kongresu Nasionál nia laran, Rede Feto mós forma ninia estatuta hamutuk ho organizasaun membru 17 ne’ebé mai husi Timor laran tomak.

Rede Feto nia programa estratéjiku mak hala’o advokasia, dezenvolve kapasidade membru, sentru informasaun no komunikasaun no haki’it feto iha partidu polítika.

Jornalista : Osoria A.Marques

Editór       : Francisco Simões

HAKEREK NO HATÁN

Please enter your comment!
Please enter your name here