Xefe suku Rotutu, José dos Santos. Foto Tatoli/Natalino Costa.

Manufahi, 19 jullu 2019 (TATOLI)- Xefe suku Rotutu, postu administrativu Same Villa, munisípiu Manufahi, José dos Santos, husu ba Governu atu prezerva fatin istóriku no sítiu turístiku sira iha Rotutu no mós halo investimentu hodi lori benefísiu ba abitante sira.

“Suku Rotutu iha nia natureza no poténsia ba kulturál, turizmu no mós ba agrikultura. Ita fiar katak ho investimentu ne’e bele lori benefísiu balun ba komunidade sira “, José dehan iha Rotutu, ohin.

Autoridade suku ne’e hatete, sobre fatin istóriku iha suku Rotutu, iha fatin barak maka sai subar-fatin ba líder rezisténsia Kay Rala Xanana Gusmão, Lere Anan Timur, Mauhunu, Nino Konis Santana inklui saudozu Venâncio Braz. Tanba ne’e, Governu tenke hadi’a no prezerva sai ba área protejida.

“Ita-nia poténsia iha Rotutu hanesan Bofu Basar Lau. Bofu Basar Lau ne’e, ita-nia Komandante en Xefe FALINTIL Xanana nia subar-fatin no nia hatene di’ak liu kona-ba fatin ne’e. Komandante Lere ne’ebé daudaun hanesan Majór Jenerál F-FDTL nia fatin subar iha Fatuk Rui, tanba momentu nia mós hetan tiru kanek husi tropa Indonézia no ema Rotutu rasik kura nia to’o kondisaun di’ak, fila bá sentru komandu FALINTIL nian”, nia Konta.

Aléinde ne’e, iha mós subar-fatin Komandante Mau-Hunu nian iha Hatu-Rae no Nino Konis Santana iha Foinana.

No mós área sira hanesan tempu funu Manufahi, refujiadu husi tasi-feto no tasi-mane subar hotu iha fatin ne’ebá ho durasaun tinan tolu.

Nia salienta mós iha fatin balun ne’ebé konsidera hanesan postu abrigu rejiaun kuatru iha 1976-1977 iha Ukaream.

Autoridade ne’e dehan prezerva fatin istóriku sira ne’e para labele lakon husi abitante Rotutu no Same tomak no nia halo ona proposta ba ministériu relevante sobre turizmu komunitáriu, uma ba kbiit laek sira iha 2017, maibé laiha rezultadu tanba impase polítika ne’ebé akontese.

Daudaun ne’e, nia halo tan proposta kona-ba bee-moos, estrada no eletrisidade atu Governu bele rezolve.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here