Diretór Administrasaun Planeiamentu no Finansa, Adolmado Soares Amaral

DILI, 19 jullu 2019 (TATOLI)—Reprezentante Ezekutivu Liga Futeból Amadora (LFA) atuál Diretór Administrasaun Planeamentu no Finansa, Adolmado Soares Amaral, hateten tinan hirak ba kotuk laiha prémiu ba kampiaun Segunda Divizaun maibé tinan ida ne’e iha tanba esforsu ezekutivu hotu nian.

Nia dehan, prémiu ne’ebé LFA oferese ho intensaun atu hatudu ba klube hotu bele haka’as-án no hatudu jogu ne’ebé kualidade hodi bele sai mós kampiaun.

“Ida ne’e foin dahuluk. Époka tolu liu-ba ita la halo hanesan ne’e. Sé mak kampiaun, nia ba ho maran de’it. Maibé, tinan ida ne’e, ita selebra hodi tau mós osan iha ne’ebá atu motiva klube sira bele haka’as-án. Tinan ida ne’e, ita tau $10.000 ba klube ne’ebé kampiaun. Espera tinan oin, ita bele tau $15.000,” dehan Adolmado ba jornalista hafoin ramata entrega prémiu ba klube kampiaun iha Estádiu Munisipál Dili, ohin.

Nia informa katak prémiu ne’ebé iha tuir kbiit LFA nian no iha jogu époka oin mai klube sira hotu sei hadau malu atu hatudu prestasaun di’ak.

Aleinde ne’e, LFA oferese mós osan atus-lima $500 ba mellór markadór. Mellór markadór ba époka ida ne’e mak Nélson Freitas (75) hosi klube Aitana FC.

Hafoin simu tiha prémiu, ba Agência Tatoli, Nélson konfesa katak nia sente kontente bainhira sai mellór markadór.

“Ha’u bele dehan la’ós fásil sai mellór markadór tanba klube barak mak joga. Jogadór estranjeiru mós barak maibé ha’u mak sai hanesan mellór markadór ne’e ha’u kontente ida hanusa ba,” tenik Nélson.

Nia promete sei hamutuk nafatin ho Aitana FC hodi reforsa iha Primeira Divizaun tinan oin no nia iha mehi hakarak lori Aitana sai kampiaun Primeira Divizaun iha tinan oin.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here