Defensor Públiku, Fernando Lopes de Carvalho. Imajen/Domingos Piedade Freitas

DILI, 19 jullu  2019 (TATOLI) – Kazu oho malu entre timoroan iha Jogjakarta, Indonézia, hodi rezulta João Bosco mate, la’ós família de’it mak triste no lakon, maibé lori mós tristeza boot ba nasaun.

Tuir jurista Fernando Carvalho nia perspetiva, kazu oho malu entre timoroan iha Indonézia fó tristeza boot ba Timor no fó mós prestíjiu la di’ak ba Timor hanesan nasaun. Sa tan, tenik Advogadu Fernando Carvalho, kazu timoroan ho timoroan mak oho malu iha ema nia rain.

“Ha’u hanoin kazu akontese sira hanesan nee dala barak iha Indonézia, se la sala akontese mós iha Inglaterra. Ne’e la di’ak ba ita nia prestíjiu hanesan nasaun iha ema seluk nia rain,” hateten Advogadu Fernanda Carvalho, ba Ajénsia  TATOLI, ohin, iha Tribunál Distritál Dili.

Nia deskonfia, talvés motivu husi timoroan ho timoroan oho malu hodi rezulta Bosco mate iha indikasaun vingansa entre grupu arte marsiál ne’ebé Estadu Timor rasik bandu tiha ona.

“Kazu nee, sei iha hela faze investigasaun nia laran, husik autoridade polisia Indonézia mak prosesa hodi buka hatene fukun husi kazu ne’e,” hateten Fernando Carvalho.

Atu hetan pena todan ka kaman ba suspeitu no autór sira, Fernando Carvalho tenik, depende ba rezultadu husi investigasaun ne’ebé autoridade Indonézia dezenvolve hela.

Nia mós husu ba adidu edukasaun sira iha rai li’ur tenke servisu makaas liu tan hodi asume knaar ida, atu la’ós de’it haree problema ne’ebé ligadu ba estudante, maibé mós problema sosiál sira seluk ne’ebé mosu iha estudante nia leet no bele fó ameasa ba estudante sira nia vida.

Notísia Relevante : PM Taur Lamenta ho Kazu Asasinatu Hasoru Bosco

Jornalista          : Domingos Piedade Freitas

Editor                : Francisco Simões

 

HAKEREK NO HATÁN

Please enter your comment!
Please enter your name here