Atividade WorldFish. Imajen hosi WorldFish.

DILI, 19 jullu 2019 (TATOLI) – Dadaun ne’e Timor-Leste iha ona sistema kolesaun dadus ne’ebé adavansadu ba peska eskala ki’ik iha mundu, tuir kedan ho lansamentu ba panel kontrolu foun ne’ebé bele rekolla dadus husi esforsu peska no totál espésie ikan ne’ebé kaer no mós ró individuál sira besik iha tempu real.

Panel kontrolu Automated Analytics System for Small-Scale Fisheries in Timor-Leste (PeskAAS), fornese dadus importante ba ofisiál peska, peskizadór no instituisaun relevante nasionál no lokál sira.

Tuir komunikasu ne’ebé TATOLI simu hosi Research Program on Fish katak, sistema ne’e sei fó karakterizasaun detalladu kona-ba peska iha Timor-Leste no jestaun ba desizaun sira ne’ebé sai adaptivu.

Sistema ne’e subliña area peska, tipu no produtividade peska iha Timor-Leste ne’ebé antes ne’e seidauk deskobre.

Diretór Jerál Peska, Ministériu Agrikultura no Peska (MAP), Eng. Acacio Guterres, hatete panel kontrolu ne’e sei fó oportunidade atu dezenvolve setor ne’e hodi hasae seguransa ai-han.

“Ami komprometidu atu investe iha sistema ne’e no servisu hamutuk ho WorldFish hodi fó kapasitasaun ba funsionariu Diresaun Jerál Peska iha nasionál no munisípiu atu jere sistema ne’e agora no futuru.”

Panel kontrolu ne’ebé publiku, bele asesu, dezenvolve no halo ona teste durante tinan rua kotuk, ne’ebé automatikamente analiza dadus husi sentru peskadór sira no unidade sira sistema tracking ró.

Iha fulan-maiu 2019, MAP kontratu ona koletór dadus hamutuk 11 atu servisu iha fatin primariu hatun ikan (sentru peskadór) hamutuk 30 iha munisípiu kosteira 11.

Koletór dadus ida-idak sei responsabiliza ba entrevista peskadór sira bainhira fila husi atividade peska no rejista iha telefone ou tablet kona-ba kuantitade ikan no espesie ikan ne’ebé peskadór sira kaer, ne’ebé mak sei upload automatikamente ba iha dadus pipeline.

Desde tinan 2018, CGIAR Research Program on Fish Agri-Food Systems (FISH) ne’ebé lidera husi WorldFish, parseiru ho empreza teknolojia ki’ik Pelagic Data Systems atu monta tracker hamutuk 359 ne’ebé uza enerjia solar ba peskadór sira nia ró.

Aparellu sira ne’e buka tuir movimentu ró nian iha tempu real no haruka kedan dadus ba panel kontrolu liu husi satelite.

Agora, WorldFish no Diresaun Jeral Peska iha prosesu nia laran atu monta númeru aparellu to’o unidade 500 iha sentru peskadór sira, reprezenta aproximadamente pursentu 20 husi ró nasionál sira.

Peska iha Timor nia eskala ki’ik tebes no peskadór sira barak liu uza bero fose hodi asesu ba habitat ahu-ruin (fringing reef, ne’ebé besik area kosteira).

Agora daudaun, ahu-ruin iha Timor-Leste iha nivel saudavel biomass ikan nian, define hanesan grupu organizmu vivu iha area no iha tempu determinadu. Iha potensia bo’ot atu dezenvolve peska eskala ki’ik hodi atinje nutrisaun nasionál no objetivu dezenvolvimentu sira.

Embaixadór Noruega ba TL no Indonézia, Vegard Kaale, hatete eksploitasaun ne’e sei aumenta presaun ne’ebé presiza jere ba sustentabilidade no sistema dadus ne’e krusial tebes atu suporta.

Alex Tilley, Sientista, Peska eskala kiik, WorldFish mós hatutan peska eskala ki’ik jeralmente diversu no izoladu, nune’e susar tebes atu buka tuir (track).

Hodi aproveita dijital no teknolojia uza loron matan, nia afirma: “Ami estabelese ona dalan assesivel no pratikavel hodi monitoriza atividade peska eskala ki’ik iha tempu real. Ida ne’e possivelmente sistema primeiru husi tipu refere iha mundu.”

Desizaun dezenvolve panel kontrolu ne’e inisia husi Fisheries Sector Support Program (2015–2019) nia okos, hetan fundus husi Embaixada Noruegia iha Jakarta no lidera husi WorldFish no MAP.

Servisu ida ne’e kontinua hela hanesan parte ida husi 100,000 Dollar Amerikanu Inspire Challenge grant husi CGIAR.

Organizasaun sira seluk hatudu ona interese atu eskala no adapta sistema refere iha nasaun sira seluk hanesan Bangladexe, Myanmar no Madagaskar.

Elementu kritikál ba dezeñu no implementasaun projetu involve ona komunidade peska no funsionáriu sira peska munisípiu nian iha kada faze.

Iha Abríl 2020, responsavel ba jestaun kolesaun dadus sei entrega ba MAP, ho WorldFish, fó suporta tékniku ne’ebé la’o hela.

WorldFish hanesan organizasaun internasionál, la ho lukrativa ne’ebé utiliza potensia peska no akikultura hodi hamenus hamlaha no kiak.

Globalmente, ema kiak liu billaun ida hetan proteina animal husi ikan no millaun 800 depende ba peska no akikultura hodi buka moris.

WorldFish hanesan membru CGIAR, parseiru peskizadór globál kona-ba futuru seguransa ai-han. Nune’e mós servisu hamutuk ho parseiru oin-oin, the CGIAR Research Program on Fish Agri-Food Systems (FISH) hasae kontribuisaun peska no akuakultura hodi hamenus kiak no hadia seguransa aihan no nutrisaun.

FISH lidera husi WorldFish, hamutuk ho ARCCentre of Excellence in Coral Reef Studies at James Cook University, Australia; the International Water Management Institute (IWMI); Natural Resources Institute (NRI) iha the University of Greenwich, England and Wageningen University & Research (WUR), Netherlands.

Iha kontestu rejional, programa parseiru servisu hamutuk ho governu, NGO, setór privadu no organizasaun peskiza hodi infuensa polítika nasionál, rejionál, globál no prátika dezenvolvimentu. (komunikadu)

HAKEREK NO HATÁN

Please enter your comment!
Please enter your name here