Família no kolega sira hulan Bosco nia mate-isin ba hatuur iha nia rezidénsia. Imajen Otélio Ote

DILI, 19 jullu 2019 (TATOLI)—VIII Governu Konstitusionál liuhusi Ministériu Ensinu Superiór Siénsia Kultura  (MESSK) deklara katak sei hapara bolsu estudu ba estudante timoroan sé-sé de’it mak ne’ebé mak komete krime ka envolve iha kazu ligasaun ho estudante timoroan João Bosco ne’ebé mak mate iha Jogja-Indonézia.

Ministru Ensiñu Superiór, Siénsia no Kultura, Longuinhos dos Santos. Imajen/Egas Cristóvão

“Oras ne’e Governu hein nafatin rezultadu esforsu ne’ebé mak adidu edukasaun iha Jakarta-Indonézia halo daudaun ona. Se iha indikasaun katak kazu ne’e envolve estudante bolseiru sira balun iha Jogja, Governu sei foti medida ida rigirozu hodi hapara bolsu estudu no diretamente haruka fila ka deporta kedas,” dehan Ministru Ensinu Superiór Siénsia Kultura  (MESSK), Longuinhos dos Santos, ba Ajénsia TATOLI liuhusi entrevista iha nia knaar fatin, Dili, sesta (19/7/2019).

Entretantu, membru Governu ne’e hatutan, se kazu ne’e mak envole estudante timoroan sira ne’ebé non-bolseiru ka la simu bolseiru, Governu sei kontaktu ho sira-nia família ka inan-aman para haruka estudante ne’e fila.

Membru VIII Governu Konstitusionál ne’e realsa tan katak estudante bolseiru ka privadu ne’ebé kontinua estuda iha ema nia rain, objetivu ida de’it atu ba eskola la’ós atu ba halo krime. Tan ne’e, estudante idaidak tenke dignifika nasaun Timor-Leste nia naran ho di’ak no ho  responsabilidade.

Notísia relevante: http://www.tatoli.tl/2019/07/familia-simu-ona-mate-isin-bosco-ho-ritual-takanab/

http://www.tatoli.tl/2019/07/suspeitu-oho-bosco-bele-hetan-pena-morte/

Jornalista: Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here