Ministru Longuinhos dos Santos. Foto TATOLI: Egas Cristóvão

DILI, 19 jullu 2019 (TATOLI) – Timoroan na’in 98 ne’ebé hetan bolsu estudu ba Portugal oras ne’e sei kontinua hela formasaun língua portugés durante fulan neen tanba konsidera portugés ne’ebé sira uza la´ós portugés sientífiku tanba ne´e governu implementa “ano zero” molok hahú estudu iha universidade.

Ministru Ensinu Superiór Siénsia no Kultura (MESSK), Longuinhos dos Santos hateten, difikuldade bolseiru timoroan sira hasoru iha Portugal ne’e tanba mudansa ba língua portugeza. Tan ne’e molok bolseiru sira aranka ba Portugal, governu  implementa ona programa “ano zero”. Ida ne’e atu ajuda bolseiru sira atu hetan uluk formasaun fulan neen iha Portugal depois mak foin hahú sira-nia estudu iha universidade.

“Ita komprende katak ita-nia estudante bolseiru sira ne’e iha Timór koalia ona portugés maibé língua portugés merkadu nian, entaun difisil ba sira atu adapta lalais ho portugés sientífiku,” hateten Ministru Longuinhos dos Santos iha edifísiu MESSK, Colmera, sesta (19/07/2019).

“Maibé la signifika bolseiru timoroan 98 pessoas ne’e la hatene portugés. Sira agora partisipa hela formasaun lian para bele ajuda sira ninia koñesementu molok kontinua ba universidade,” reforsa tan governante ne´e.

Membru Oitavu Governu ne’e rekoñese katak maske estudante sira enfrenta difikuldade maibé sira mantein komprimísiu molok sai husi Timór.

“MESSK to’o agora seidauk simu informasaun husi adidu edukasaun iha Portugal katak estudante 98 ne’e balun desvia aan husi sira-nia formasaun lian portugés hodi ba servisu fali iha fatin seluk,” informa Ministru Longuinhos dos Santos.

Notísia relevante: http://www.tatoli.tl/2019/06/adidu-edukasaun-sujere-bolseiru-sira-promove-identidade-timor-leste-iha-portugal/

Jornalista : Tomé Amado

Editór       : Rafy Belo  

HAKEREK NO HATÁN

Please enter your comment!
Please enter your name here