Ministru Transporte no Komunikasaun, José Agostinho da Silva. Imajen/Antonio Goncalves

DILI, 18 jullu 2019 (TATOLI)—Ministru Transporte no Komunikasaun, José Agostinho da Silva hateten Ministériu Transporte no Komunikasaun iha hanoin atu estabelese transporte terrestre alternativa hodi halo atendimentu ba públiku.

“Iha planu 2020, atu haree oinsá mak ita-nia dirasaun ne’ebé mak iha bele asegura ho bis ida, karik iha situasaun greve, transporte alternativu sira bele halo atendimentu,” tenik José Agostinho iha Palásiu Governu, Dili, kinta (18/7).

Nia dehan, durante  ne’e Governu seidauk iha transporte alternativu, tanba ne’e tenke iha transporte ruma atu bele asegura karik iha situasaun greve ruma, transporte alternativu bele nafatin halo atendimentu.

“Esperiensia ne’ebé mak iha durante ne’e ita hatene, ita nia estudante sira bainhira atu besik ba ezame nasionál, ita-nia mikrolet sira halo mogok (greve). Entaun, iha tempu ne’ebá difikulta ita-nia oan sira ba eskola no Governu seidauk iha transporte alternativu,” Agostinho haktuir.

“Ita tenke negósia ho sira no pior liu ho sofér, la’ós ho patraun. Tuir loos, sofér ne’e nia hatene bainhira mak ninia patraun ne’e selu ninia direitu. Maibé, realidade ne’ebé iha fulan kotuk liu-ba ha’u-nia diretór ba negósia ho sofér sira,” nia akresenta.

Maski nune’e, governante ne’e realsa, objetivu transporte alternativu la’ós atu halo kompetisaun, maibé atu fó solusaun ba situasaun sira ne’ebé akontese.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here