Família no kolega sira hulan Bosco nia mate-isin ba hatuur iha nia rezidénsia. Imajen Otélio Ote

DILI, 19 jullu 2019 (TATOLI)–Mate-isin João Bosco Batista Colo Batan, to’o ona uma Oé-Cusse, iha tuku 16:30 oras Timor-Leste.

Reprezentante família, Gastão Poto via telefónema, informa mate-isin ohin dadeer transporta hosi Jogjakarta no to’o iha Kúpaun-Indonézia, iha tuku 7:00 oras lokál.

Mate-isin tula ho carro funerário ne’ebé oferese hosi Rumah Sakit Umum  Provínsia Kúpaun-Indonézia, no to’o iha Fronteira Sub-rejiaun Oesilo iha tuku 15:00  Timor-Leste, iha ne’ebé família simu mate-isin ho serimónia ‘Takanab’.

Prezidente RAEOA, Marí Alkatiri, ho nia sekretáriu sira vizita Bosco nia mate-isin. Imajen Otélio Ote

Takanab iha lian Baikenu ho nia sentidu, fó naran ba buat ruma, tuir kultura Atoni. Katak, transforma buat ruma sai ema, ka fó onra ba buat ruma hodi hahí nia nu’udar ema.

Takanab  hanesan mós serimónia rituál ne’ebé babain uza hodi simu ema importante ruma, hanesan liurai ka ema ne’ebé estruturálmente iha kargu aas iha sosiedade.

Baibain takanab ne’e ho forma puizia, ne’ebé hafalun mós linguajen hodi fó bemvindu, linguajen hahí ba liurai ne’ebé povu hadomi.

Ema hirak ne’ebé serve atu involve direta iha takanab ne’e, la’ós ema baibain, maibé tenke ema ne’ebé eskollidu, hetan fiar no aprovasaun kulturálmente, tanba takanab ne’e iha ninia  karáter sakrál.

Gastão Poto esplika, hafoin serimónia takanab, mate-isin hetan bensaun hosi Pároku Parókia São Miguel Arcanjo Padiae, Padre Carlos de Deus, liafuan agradesimentu hosi reprezentante embaixadór Timor-Leste iha Indonézia ba prosesu transladasaun mate-isin to’o Timor, liafuan agradesimentu hosi família matebian no kontinua transporta mate-isin ba rezidénsia iha Aldeia Masin, Suku Costa, Sub-rejiaun Pante Makassar, Rejiaun Administrativa Espesiál Oé-Cusse Ambeno (RAEOA).

Tuir observsaun Gastão katak família no kolega ne’ebé hasoru mate-isin Bosco iha fronteira ho karreta ruanulu resin, motór besik atus-rua, durante iha dalan ba Oé-Cusse vila, komunidade sira hamriik iha  dalan ninin, hodi hato’o sira-nia sentidu pézame ba matebian.

Mate-isin to’o iha rezidénsia Aldeia Masin iha tuku 16.30, simu hosi família, ne’ebé hetan mós prezensa hosi Prezidente Autoridade Rejiaun Administrativa Espesial Oé-Cusse Ambeno (RAEOA), Marí Alkatiri ho nia sekretáriu sira.

Durante hosi Kúpaun-Indonézia, mate-isin Bosco hetan seguransa hosi Polísia Repúblika Indonézia (POLRI) Kúpaun na’in neen, Militár Indonézia (hosi Polísia Militár) na’in rua, to’o Oé-Cusse.

Jornalista: Cipriano Colo

Editor: Xisto Freitas

 

HAKEREK NO HATÁN

Please enter your comment!
Please enter your name here