Indonesia sai Primeira Lugar kurida Roo husi Darwin Mai Timor Leste.Imajen/Antonio Goncalves

DILI, 19 jullu 2019 (TATOLI)-Eventu internasionál anuál regata Darwin-Dili 2019 ba dasanuluk nian remata ona (iha sesta 19/07) no segunda (22/07) kontinua korrida ró husi Dili bá Oekusi.

“Prémiu, Komisaun  Organizadora sira prepara ho osan mil $9 ba ró neen ne’ebé mai hosi Darwin, depois entrega prémiu ba sira, iha segunda ne’e sei arranka fali bá Oekusi”, Vise Koordenadora ba eventu internasionál ne’e, Cármen Joela Pereira, ba jornalista sira iha Sentru Informasaun Turístika, Lesidere, sesta ne’e.

Nune’e, aban Komisaun Organizadora sira akompaña korrida ró sira-nia viajen bá Oekusi, kuandu to’o ona iha fatin destinasaun hafoin komisaun entrega ba RAEOA-ZEEMS hodi responsabiliza.

Iha faze ida ne’e, ró neen maka kompete inklui grupu no indivíduu hosi Darwin mai Timor-Leste. Komisaun organizadora atribui prémiu ba manán- na’in sira ho kategoria hanesan, manan na’in ho tempu lais maka grupu Antipodes ho velosidade 48h09 no hetan prémiu onoráriu (CYATL Line Honours Trophy) ho valór osan $1000.

Manán-na’in dahuluk ba kategoria handicap winner -divizaun l-IRC (Monohull) maka Antipodes ho prémiu 74 trophy ho montante osan $2000, segundu lugár ba kategoria maka Colie ne’ebé hetan 75 trophy ho valór $1500.

Kategoria tuirmai maka handicap winner-divizaun I-(Monohull) competitive cruising, manán hosi Red Knot ho prémiu MTAC trophy ho osan $2000, sai segundu lugar maka Anastacia ho tipu prémiu hanesan MTAC trophy ho valór $1500, no  kategoria tuirmai maka cruising/rally divizaun-divizaun II, hetan hosi grupu Forever Young ho prémiu hardy aviation trophy ho osan $1000.

Tuir planu, komisaun organizadora hakarak ró tenke barak iha períodu ida ne’e, maibé eventu ne’e mós akontese iha ASEAN no Pasífiku, nune’e partisipasaun maka ida ne’e.

Tanba ne’e, bá tinan oin mai komisaun husu ba timoroan sira atubele partisipa iha eventu ida ne’e, nune’e, aleinde Austrália, país seluk hanesan Malázia, Tailándia no  seluk tan bele envolve hotu.

Notísia relevante : MTKI Halo Preparasaun Ba Eventu Anuál Regata Darwin-Dili 2019

Jornalista: Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here