Peskadór Lucio Bernardino husi Com, Lautem, ne'ebé laloran tasi lori ba mosu fali iha Tual, Maluku, Indonéza, Sesta aban (19/07/2019), to'o hikas iha Timor-Leste. Imajen/Embaixada TL iha Indonézia

DILI, 18 jullu 2019 (TATOLI)–Embaixada Timor-Leste iha Repúblika Indonézia (RI) fasilita prosesu dokumentu no tiketi aviaun ba peskadór Lucio Bernardino, hodi fila mai Timor ho seguru no dignu.

 Peskadór Lucio Bernardino husi Postu Administrativu Com, Munisípiu Lautem, lakon iha fulan ida liubá, bainhira halo atividade peska iha tasi area Munisípiu Lautem nian no mosu fali iha Tual, Provínsia Maluku, Indonézia.

“Emigrasaun Maluku nian komunika ba Embaixada TL iha Jakarta kona-ba peskadór timoroan ne’e no embaixada fasilita nia billete aviaun ho dokumentu nesesáriu para nia bele fila ba Timor ho seguru no dignu,”  hateten Embaixadór TL iha Indonézia, Alberto X.P. Carlos, ohin, ba ajénsia TATOLI via mensajen rede sosiál WhatsApp.

Embaixadór Alberto X.P. Carlos mós simu ona informasaun ofisiál katak, peskadór Lucio Bernardino, oras ne’e to’o ona iha Denpasar-Bali, Indonézia no Sesta aban (19/07/2019), Lucio sei to’o hikas iha Timor-Leste ho aviaun Citilink.

“Ita nia sidadaun ne’e to’o ona iha Bali ho saúde di’ak. Aban dadersán,  arranka ba Dili ho aviaun  Citilink,” haktuir Embaixadór Alberto X.P. Carlos.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here