Ekipa DIT FC selebra sira-nia vitória. Imajen Tatoli/Hortençio Sanchez

DILI, 19 jullu 2019 (TATOLI)—Ekipa DIT FC susesu sai kampiaun iha jogu Segunda Divizaun Liga Futeból Amadora (LFA) époka 2019 hafoin halakon nia adversáriu, Aitana FC, ho rezultadu golu 3-1 iha Estádiu Munisipál Dili, ohin lorokaik.

Maski lakon maibé Aitana kontinua hakat nafatin ba Primeira Divizaun hamutuk ho DIT ho pozisaun hanesan runner up (daruak).

Golu vitória DIT marka hosi jogadór José Santos (7) iha minutu 66, 90+1 no Ervindo Soares (20) iha minutu 68. Enkuantu, golu úniku Aitana marka hosi Nélson Freitas (75) iha minutu 3.

Premiu ba DIT iha kampiaun ne’e mak simu medalla, tasa ida no osan hamutuk $10.000. Treinadór DIT FC, Francisco, sente kontente ba vitória ne’ebé nia ekipa hetan.

“Ha’u kontente tebes ba vitória ne’e. Vitória ida ne’e liuhosi esforsu jogadór sira hotu nian,” dehan Francisco. Nia promete sei lori DIT mantein iha Primeira Divizaun no lakohi fila hikas ba Segunda Divizaun hanesan tinan hirak liu-ba kotuk.

Iha sorin seluk, Treinadór Aitana FC, Salvador da Silva ‘Asala’ konfesa katak biar lakon maibé kontente nafatin tanba jogu sempre iha lakon no manán. “Jogu ohin kapa’as maibé ami tenke simu realidade. Jogu sempre hanesan ne’e—Iha lakon no manán,” dehan Asala.

Hanesan treinadór, nia tenik, nia iha nafatin espíritu atu hadi’a di’ak liu-tan Aitana nia jogu iha Primeira Divizaun tanba haree ba klube ne’ebé hamahan-án iha Primeira Divizaun mesak kualidade.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here