Eis Diretór Nasionál Diseminasaun Informasaun (DNDI) (klaran), Orlando da Conceição reprezenta SEKOMS halo abertura formasaun. Foto TATOLI: Egas Cristovão

MANUFAHI, 19 jullu 2019 (TATOLI)-Prezidente Komisaun Organizadora Naroman ba Suku, Orlando da Conceição, informa lansamentu Naroman ba Suku ne’ebé sei realiza iha suku Rotutu, postu administrativu Same Villa, munisípiu Manufahi, aban, sei prienxe ho atividade rua hanesan diálogu komunitáriu no konsertu muzikál.

“Konsertu muzikál ne’e, sei konvida mós artista nasionál hanesan Maria Vitória ne’ebé mós Rotutu oan no Leo Moniz no Dikur Ramelau maka sei diverte komunidade Rotutu”, Orlando ba jornalista sira iha Rotutu, ohin.

Aléinde ne’e, sei iha mós divertimentu husi artista Gerson Oliveira no Quito Belo.

Ligadu ba lansamentu programa Naroman ba Suku, Orlando da Conceição, informa preparasaun to’o ona porsentu 99.

Nia salienta eventu Naroman ba Suku ne’e rasik dezde iha 10 jullu, Sekretáriu Estadu Komunikasaun Sosiál (SEKOMS) lansa feira komunitária ba rezidente Rotutu.

Horisehik, ekipa SEKOMS hamutuk abitante no lia-na’in vizita fatin turístiku iha foho Kablaki nian no ohin lia-na’in husi suku Rotutu hamutuk hodi halo serimónia rituál hodi simu bainaka importante sira no kompleta tan nesesidade ne’ebé atu kompleta ba lansamentu nian.

“Bainaka ba eventu ne’e, husi nivel munisípiu nian, sira mai hotu ona iha Rotutu, inklui reprezentante husi suku 28 iha Same”.

Iha feira Naroman ba Suku, abitante sira aprezenta artezanatu, sasán tradisionál no produtu lokál  no SEKOMS mós loke filme inspirativu sira ba rezidente Rotutu.

Tuir sekuénsia programa nian, lansamentu Naroman ba Suku sei hala’o iha tuku tolu loraik, aban, iha Rotutu.

Membru Governu Na’in-Sanulu Sei Partisipa Iha Lansamentu Naroman ba Suku

Prezidente komisaun organizadór, Orlando da Conceição, informa membru Governu hamutuk na’in-sanulu mak sei partisipa iha ba lansamentu Programa Naroman ba Suku, iha suku Rotutu.

“Too ohin, membru governu na’in-sanulu maka konfirma marka prezensa”.

Nia dehan, aléinde membru governu, sei iha mós konvidadu hanesan deputadu sira ne’ebé konfirmandu atu marka prezensa no iha mos diretór jerál, diretór nasionál balun no mós entidade autónoma sira hanesan Rttl, Konsellu Imprensa no Ajénsia Tatoli.

Orlando hatutan konvidadu nasionál sira ne’ebé komisaun organizadora konvida ne’e hamutuk 80.

Notísia relevante : 20 Jullu, Lansamentu ba Programa ‘Naroman Ba Suku’

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here