Xefe Suku Lontas, Alípio Belo. Foto/Facebook.

DILI, 19 jullu 2019 (TATOLI)-Xefe Suku Lontas, postu administrativu Lolotoe, munisípiu Bobonaru, Alípio Belo, husu governu liuhosi Ministériu Obra Públika (MOP) atu halo kanalizasaun bee-moos ba abitante iha aldeia Tasmil, Ozo no Piron.

 “Ami nia suku kompostu husi aldeia Tasmil ho abitante 79, Ozo na’in-59, Piron na’in-52 seidauk asesu ba kanalizasaun bee-moos”, Alípio Belo ba Ajénsia TATOLI via Whatshapp, ohin.

Entre aldeia tolu ne’e, autoridade lokál ne’e dehan, aldeia Tasmil ne’e bee-moos laiha, ne’ebé abitante la’o kuaze kilómetru ida mak foin kuru iha bee-matan.

Ba aldeia Ozo no Piron ne’e iha tempu bailoron naruk bee menus tanba kuru de’it iha bee-matan. Iha 2010, nia dehan servisu Água no Saneamentu halo ona kanalizasaun ba bee-moos, maibé laiha manutensaun hafoin dezastre naturál estraga pipa no tanke bee-moos.

“Ha’u atu halo ona proposta ba prezidente autoridade munisípiu, maibé dehan labele halo ona tanba Governu tau ona prioridade ba bee-moos iha área rurál,” katak.

Tanba ne’e, Xefe Suku Alípio Belo husu ba MOP atu rezolve urjente ba ezijénsia rezidente aldeia tolu nian hodi asesu bee-moos.

Aléinde ne’e, Alípio Belo informa umakain 43 ne’ebé afeta husi dezastre naturál iha tinan 2017 no 2018 seidauk hetan apoiu husi governu.

Entretantu, nia husu ba Ministériu Edukasaun Juventude no Desportu (MEJD) atu haree kondisaun eskola bázika filiál (EBF) Ozo ho Piron iha suku Lontas.

“Ha’u rasik hasoru difikuldade atu atende komunidade tanba laiha komputadór no printer, ne’ebé halo dokumentu ruma tenke hakerek ho liman,” tenik.

Notísia relevante : PM Husu Ministériu Relevante Hadi’a Distribuisaun Bee-Moos

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here