Família no Komisaun Organizadora informa preparasaun haloot restu mortál saudozu 'Mau Brani', ba Prezidente Republika (PR), Francisco Guterres Lú Olo. Imajen Mídia PR

DILI, 19 jullu 2019 (TATOLI)—Família hamutuk ho Komisaun Organizadora informa ba Prezidente Repúblika (PR), Francisco Guterres Lú Olo, kona-ba preparasaun haloot restu mortál saudozu José Cirilo Nunes, ‘Mau Brani’, iha Palásiu Prezidente Nicolau Lobatu, Bairru Pite, Dili, sesta ne’e.

Hafoin enkontru, reprezentante família hanesan mós Prezidente Komisaun Organizadora ba serimónia haloot restu mortál, atuál deputadu Felix da Costa ‘Anin Buras’ relata, audiénsia ne’e, hanesan konsiderasaun ba Prezidente Repúblika reprezenta estadu.

Aleinde ne’e, saudozu mós durante funu hamutuk ho atuál Prezidente Repúblika no mós atuál Primeiru-Minstru (PM), Taur Matan Ruak iha Ponta Leste. Oras ne’e dadaun, restu mortál saudozu Mau Brani iha hela mortuáriu Hospital Nacional Guido Valadares (HNGV) hafoin hetan iha 2012, no tuir oráriu, iha loron 5 agostu sei lori sai ba uma Tuana-Laran, loron 7 agustu sei lori liu-ba Knua Bibikimia, Postu Administrativu Maubara, Munisípiu Liquiçá.

Hafoin ne’e, iha loron 9 agustu, sei lori mai Maubara Vila no iha loron 10 agostu sei lori sai hosi Maubara liuhosi sede Komité Sentrál FRETILIN (CCF-sigla portugés) no ba haloot iha Jardim dos Herois Metinaro.

Felix da Costa hateten, Prezidente Repúblika agradese tanba família bele organiza hodi haloot restu mortál saudozu no Prezidente rasik rekoñese katak uluk hamutuk ho saudozu nu’udar Segundu Komandante Brigada Choque Nasionál iha kampu batalla (ailaran).

Prezidente Repúblika haklaken, estadu iha devér atu konserva memória no tau saudozu sira iha fatin ida dignu.

Durante luta hasoru okupasaun Indonézia, ‘Mau Brani’ tau matan ba seguransa iha Batugede iha prinsípiu dezembru 1975.  Saudozu kaben ho Joana Rosário Fátima Ximenes Nunes (matebian) no husik hela oan na’in tolu, Judit da Silva Nunes, Júlio da Silva Nunes no Yolanda da Silva Nunes.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here