Reprezentante Espesiál Governu ba asuntu petróleu, Kay Rala Xanana Gusmão, akompaña hosi Reprezentante VIII Governu Konstitusionál iha Debate Urjénsia Proposta Lei haat, iha Parlamentu Nasionál, kinta, 18 jullu 2019. Imajen Tatoli/António Gonçalves

DILI, 18 jullu 2019 (TATOLI)-Xefe Negosiadór Prinsipál ba Asuntu Fronteira Marítima, Kay Rala Xanana Gusmão, dehan atu rezolve fronteira marítima (tasi) no terrestre (rai) ho Indonézia ne’e presiza tempu, tanba ne’e presiza hala’o negosiasaun entre Estadu rua no povu ho povu.

“Ita haree Fronteira Terrestre, ho segmentu tolu de’it mós to’o ona tinan 17 seidauk, ne’ebé ita bele komprende natureza negosiasaun ho Indonézia diferente ho Austrália nian tanba ho Austrália ne’e osan, ho Indonézia ne’e seluk,” Xanana Gusmão hatete bainhira hala’o audisaun ho komisaun A, B no C iha Parlamentu Nasionál, kinta ne’e.

Tanba ne’e, Xanana Gusmão dehan, Indonézia ukun aan iha 1945, maibé atu rezolve fronteira marítima ho Malázia, Singapura, no Filipina inklui nasaun seluk mós seidauk rezolvidu.

Nune’e, Xefe Negosiadór ne’e afirma, depende ba negosiasaun ho Indonézia. “Ami prepara aan atu ko’alia ho Indonézia, maibé nasaun balun ho Indonézia tinan 50 ona, maibé seidauk rezolve”.

Lider karizmátiku akresenta, se sira ukun aan dezde 1945, seidauk rezolve, oinsá ho Timor-Leste ne’ebé ukun aan iha 2002.

Kona-ba tempu atu rezolve, Xanana Gusmão dehan “ita labele asegura katak tinan oin ne’e ita bele rezolve ona, ne’e labele hanoin hanesan. Prezidente Joko Widodo de’it iha nia mandatu anteriór nia dehan prioridade ba Indonézia ba diskute fronteira marítima ho Timor-Leste no nasaun seluk, mas to’o agora seidauk”.

Tanba ne’e, Xefe Negosiadór Xanana Gusmão ho ekipa kontinua halo negosiasaun, maibé laiha dalan atu Timor-Leste ba ezije sira atu trata lalais asuntu ne’e.

Daudaun, ekipa negosiasaun nafatin negosia ho Estadu Indonézia atu to’o tempu ida bele rezolve fronteira marítima no terrestre.

Antes ne’e, eis Primeiru-Ministru, Rui Maria de Araújo ho Prezidente Indonézia, Joko Widodo, deside ona hodi rezolve problema fronteira terrestre no hahú analiza kestaun fronteira marítima hahú husi norte ba súl.

Estadu Timor-Leste no Indonézia konkorda aselera esforsu sira hodi determina sesaun rua hosi fronteira terrestre ne’ebé seidauk rezolve iha Noel Besi-Cintrana, Bijael Sunan-Oben.

Notísia relevante : TL Iha Negosiasaun Fronteira Terrestrial-Marítima

Negosiasaun Fronteira Terrestre TL-RI Sei Sai Ezemplár Ba Mundu

Jornalista: Florêncio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here