DILI, 18 jullu 2019 (TATOLI)-Sekretáriu Estadu Protesaun Sivíl liuhosi Diresaun Jestaun Dezastre hahú ona halo verifikasaun dadus ba vítima dezastre naturaís ne’ebé akontese iha 2018 to’o 2019.
Xefe Departamentu Emerjénsia, Ermelinda Pires, ba Ajénsia TATOLI, Kuarta (17/07/2019), iha nia servisu fatin, Bemori, Dili, informa katak, prosesu verifikasaun ne’e foin hahú tanba ninia parte foin simu relatóriu hosi munisípiu sira.
Tuir relatóriu Diresaun nian katak, uma kain 2.797 maka hetan dezastre durante 2018 no iha tinan 2019 rezulta uma kain 206, maibé uma kain 106 mak tama kategoria estragus total.
Kona-ba apoiu material konstrusaun, Xefe departamentu ne’e hatete, seidauk hala’o tanba sei kontinua iha prosesu verifikasaun dadus iha nivel nasionál hodi identifika loloos uma kain hira maka tama kategoria estragus todan, kaman no natoon.
Make nune’e, nia tenik, apoiu emerjénsia hanesan sasán nesesidade báziku distribui hotu ona ba munisípiu sira ne’ebé afetadu.
Notísia Relevante : Dezastre Naturaís Rezulta Na’in Haat Mate no Sobu Uma 106
Jornalista : Nelson Sousa
Editór : Francisco Simões
