DILI, 18 jullu 2019 (TATOLI)—Klube AD SLB Laulara halakon ekipa Académica hosi Universidade Nacional Timor Lorosa’e (UNTL) ho rezultadu set 3-2, iha jogu meia finál Tasa ADR União ne’ebé hala’o iha Jináziu Dili, ohin.

Jogu parte primeiru hahú, ekipa rua halo kontra-atake ba malu liuhosi baku bola liman ba liman tuir ritmu jogu voleiból nian, iha ne’ebé Académica konsege mellora set primeiru kontra nia adversáriu SLB ho pontu 25 kontra 23 hodi hatuur skore ba 1-0.

Iha set segundu, SLB konsege hasa’e espíritu jogu hodi responde set segundu ho pontu 25 kontra 23 hodi muda rezultadu ba 1-1. Kontinua ba set terseiru, ekipa Makikit Laulara kontinua mellora pontu kontra Académica ho pontu 25 kontra 17 nune’e rezultadu muda ba 2 -1.

Hakat ba set kuartu, Académica halo blokeia maka’as hodi aumenta pontu ba nia ekipa iha ne’ebé nia ekipa konsege halo impata jogu ho rezultadu 2 -2 ho pontu 25 kontra 14. Enkuantu, iha set ikus, vitória tenke hela ba SLB tanba jogadór hosi ekipa refere halo kontra-atake ne’ebé maka’as to’o ikus hakat duni ba finál bainhira manán ho rezultadu 15-11.

Hosi derrota ne’ebé Académica hetan, ekipa refere sei iha oportunidade hodi hasoru fali ekipa Café iha loron tuir mai, nune’e bele buka sé loos mak atu sai terseiru lugár ba jogu refere. Iha parte seluk, SLB sei hasoru ekipa Choque iha finál hodi buka sé loos mak atu sai kampiaun ba Tasa ADR União 2019.

Entretantu, Jogu ne’e hala’o atu komemora loron ezisténsia Asosiasaun Desportiva Rekreativu (ADR União) ba dala neennulu resin-haat (64).

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here