Xefe Departementu Abastesimentu, Servisu Agua no Saneamentu (SAS), Francisco Xavier Pereira. Imajen/Osória A.Marques

DILI, 18 jullu 2019 (TATOLI)-Diresaun Servisu Agua no Saneamentu (SAS), oras ne’e no kontinua nafatin halo manutensaun ba kanalizasaun bee moos ba konsumidór sira iha Dili laran.

Parte ne’ebé ekipa tékniku SAS nian kontinua halo manutensaun, mak kanalizasaun hirak ne’ebé konstrui hosi tempu Governu Portugés no Governu Provínsia Timor-Timur nian hodi garante fornesimentu bee moos ba konsumidór sira iha Kapitál Dili.

“Kanu hirak ne’e balu ami troka ona, liuliu kanu tempu Portugés no Indonézia nian tanba kanu sira ne’e barak intupidu,”  informa Xefe Departamentu Abastesimentu SAS, Francisco Xavier  Pereira ba Jornalista sira, ohin, iha nia servisu fatin Mascarinas, Dili.

Atu apoia reforsa servisu ekipa tékniku SAS nian iha terrenu, Francisco Xavier Pereira hateten, SAS kontrata ona kompañia Karisma hodi hadi’a kanu bee moos no monta kontadór ba konsumidór ida-idak iha sira nia hela fatin.

Kanu hirak ne’ebé konsege troka ona hosi diresaun ne’e maka iha área iha Delta I, II, III no IV. Maibé iha área seluk sei iha prosesu verifikasaun hodi halo manutensaun.

Relatóriu verifikasaun  hatudu katak, kanu barak maka ko’ak tanba hetan estragus hosi komunidade no sei kontinua eziste ligasaun  ilegál tanba ne’e afeita ba komunidade barak seidauk hetan bee moos hanesan iha area Bckora, Taibesi, Manumeta Raihun, Manleuana no mós Tasi-tolu.

Diresaun SAS iha rede distribuisaun bee moos hamutuk 26 ne’ebé lokaliza iha kada postu administrativu iha Dili laran,  maibé   iha 24 maka funsiona  no rua avaria.

Tanki bee moos SAS nian  atu kontinua asegura distribuisaun bee moos lokaliza iha Benamauk, Lahane, Maloa, Mota Comoro  no seluk tan.

“Populasaun sira ne’ebé mak dook husi rede distribuisaun ne’e ami fornese bee liu husi tanki SAS nian  nune’e mós la’ós karreta SAS nian de’it maibé karreta privadu sira mós bele tula mas tenke rejistu iha SAS mak foin ba kuru,” nia hateten.

Xefe Departamentu Abastesimentu ne’e esplika, bazeia ba dekretu lei Nú.4/2004 hatete, bee moos hanesan rekursu infinitivu  ne’ebé mak importante ba nesesidade ema nian no ba dezenvolvimentu.

Jornalista : Osória A.Marques

Editór       : Francisco Simões

HAKEREK NO HATÁN

Please enter your comment!
Please enter your name here