Negosiadór Prinsipál, Xanana Gusmão, bainhira aprezenta alterasaun Lei Haat iha Parlamentu Nasionál. Imajen dok. Tatoli

DILI, 18 jullu 2019 (TATOLI)—Parlamentu Nasionál aprova ona Pakote Lejizlativa Ratifikasaun Tratadu Fronteira Marítima, ne’ebé kompostu hosi Proposta Lei Haat no Rezolusaun ida hosi Governu.

Kada proposta lei no rezolusaun ne’e aprovadu ho votu maioria, maski opozisaun Bankada FRETILIN vota kontra.

Lei hirak ne’ebé hetan ona aprovasaun iha jeneralidade mak hanesan Lei númeru 5/V, segunda alterasaun lei 9/2015, 3 agostu, kona-ba Lei Fundu petrolífera, aprova ho votu a-favór 41, kontra 23 no abstensaun 1.

Proposta lei númeru 6/V- primeira alterasaun lei númeru 8/2008, 30 juñu kona-ba Lei Tributária no primeira alterasaun lei númeru 3/2003, 1 jullu kona-ba Tributasaun Kontrante ba Bayu Undan, aprova ho votu a-favór 41, kontra 23, no abstensaun 0.

Nune’e mós primeira alterasaun lei númeru 4/2003, 1 jullu kona-ba Dezenvolvimentu Petróleu iha Tasi Timor (estabilidade tributária); segunda alterasaun lei númeru 13/2005, 2 setembru- Lei Atividade Petrolífera, aprova ho votu a-favór 41, kontra 23 no abstensaun 1.

Ikus liu, proposta númeru 7/V-Rejime Laborál no Migratóriu Espesiál Aplikável ba Projetu Bayu-Undan, aprova ho votu a-favór 42, kontra 23 no abstensaun 0.

Ministru Estadu Prezidénsia Konsellu Ministru no Ministru Petróleu no Rekursu Minerál en-ezersísiu, Hermenegildo Augusto Cabral Pereira lori Governu nia naran hakarak reitera katak timoroan unidu hanesan prova ona iha tinan 24 nia laran iha rezisténsia.

“Ita konsege hakotu ita-nia vijilánsia no ita hamutuk iha 30 agostu 1999 hodi orienta ita-nia povu ba vota, ita bele halo tan dala ida iha loron 30 agostu ne’e para konsolida,”  intervensaun Ministru Hermenegildo ‘Agio’ antes tama iha votasaun jeneralidade ba Pakote Lejizlativa Ratifikasaun Tratadu Fronteira Marítima iha plenária, kinta kalan.

Iha oportunidade ne’e, Xefe Bankada FRETILIN, Aniceto Guterres hateten alterasaun ba diploma hirak ne’e hodi satisfáz de’it investidór boot sira.

“Tanbasá mak halo alterasaun lei atu halo de’it vontade potensiál investidór balun, ami refere liu ba Lei Tributária,” nia dehan.

Enkuantu, Xefe Bankada CNRT, Duarte Nunes hateten hafoin halo análize ba lei haat ho tratadu fronteira marítima ne’e nu’udar pakote ida ne’ebé sira-nia konteúdu la sees ba malu no labele fahe.

“Fronteira Marítima entre Austrália no Timor-Leate hanesan parte komplementár hosi ita-nia soberania ne’ebé nia demarkasaun tenke ratifika hosi Parlamentu Nasionál hodi sai hanesan dokumentu ofisiál nune’e parte rua tenke hakruuk tuir lei no konvensaun internasionál sira,” nia afirma.

Xefe Bankada PLP, Francisco de Vasconcelhos reafirma katak delimitasaun fronteira marítima ne’ebé definitiva ho Austrália konsidera hanesan aktu afirmasaun soberania hosi territóriu Timor-Leste nian.

Xefe Bankada PD, António da Conceição rekoñese susesu boot ne’ebé Timor-Leste hetan ba fronteira marítima hodi marka tan istória ida iha prosesu harii nasaun no hametin ukun rasik-án.

“PD saúda no orgullu konkista polítika ida ne’ebé dala ida tan mai hodi dignifika nafatin sakrifísiu eroi sira-nian, liliu mártir tombadu-sira no batalla ba independénsia,” nia hateten.

Deputadu Bankada KHUNTO, António Verdial apresia serbisu ekipa negosiadór ne’ebé durante ne’e luta atu hetan Delimitasaun Fronteira Marítima.

Xefe Bankada UDT/FM, Gilman Exposto dos Santos konsidera ratifikasaun tratadu entre Timor-Leste no Austrália hodi estabelese Fronteira Marítima iha Tasi Timor hanesan susesu boot ne’ebé estadu liuhosi Negosiadór Prinsipál alkansa iha konsiliasaun obrigarória ho Austrália.

Xefe Bakada PUDD, António de Sá Benevides hateten atu altera lei bainhira lei laiha ona relevánsia ho situasaun atuál, maski nune’e bankada ne’e fó suporta ba Governu.

“Bankada PUDD simplesmente hakarak afirma fó konfiansa tomak ba Governu no entidade relevante ne’ebé sei implementa lei ne’e,” nia tenik.

Hafoin votasaun iha jeneralidade, plenária halo deliberasaun hodi aprova diskusaun no votasaun ba Pakote Lejizlativa hirak ne’e iha faze espesialidade sei realiza iha kada komisaun ne’ebé kompostu hosi Komisaun B, C, no D.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here