Ministru Transporte no Komunikasaun, José Agustinho da Silva. Imajen Tatoli/Egas Cristóvão

DILI, 18 jullu 2019 (TATOLI)—Ministru Transporte no Komunikasaun, José Agostinho da Silva halo audiénsia ho Primeiru Ministru (PM), Taur Matan Ruak, hato’o planu ministériu tinan 2020 nian liliu atu harii asosiasaun kondutór ba transporte públiku.

“Transporte públiku hanesan taxi, mikrolet no bis hanesan transporte privadu ema-nian. Tanba ne’e, Governu seidauk konsege organiza sira. Ne’e duni, iha hanoin oinsá atu kria asosiasaun ba sira, para kuandu iha asuntu ruma ita ko’alia ho asosiasaun, labele ko’alia ho sofér,” nia tenik iha Palásiu Governu, Dili, kinta (18/7).

Nia rekoñese katak transporte terrestre, liliu transporte públiku, bazeia ba realidade durante ne’e sei dezorganizadu.

Iha oportunidade ne’e, nia mós hato’o ba Xefe Governu atu oinsá bele prosesa atribuisaun karta kondusaun ne’ebé di’ak ba kondutór sira.

“Tenke haree ba nia prosedimentu no priénxe rekizitu ka lae, para iha futuru nia bele lori kareta iha Timor no iha rai li’ur. Entaun, ha’u sujere atu ita kria eskola karta kondusaun, para ema ida bainhira atu hetan karta kondusaun, nia tenke hatene regra sinál tránzitu, lei no oinsá bele asegura pasajeiru nia vida,” nia subliña.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here