Ministru Transporte no Komunikasaun, José Agostinho da Silva. Imajen/Antonio Goncalves

DILI, 18 jullu 2019 (TATOLI)—Ministru Transporte no Komunikasaun, José Agostinho da Silva fó ona instrusaun ba Diresaun Nasionál Aprovizionamentu (DNA) atu aselera prosesu produsaun xapa matríkula no blanku karta kondusaun orijinál iha DNA.

“Hau fó ona instrusaun ba Diresaun Nasionál Aprovizionamentu, oinsá mak bele aselera prosesu, nune’e ita fó atendimentu ne’ebé di’ak ba ita-nia kliente sira,” nia tenik iha Palásiu Governu, kinta ne’e.

Nia dehan, ba blanku karta kondusaun oras ne’e dadauk atendimentu la’o hela, enkuantu xapa matríkula mak agora dadauk iha prosesu aprovizionamentu.

“Tanba ne’e tenke aselera prosesu para ita-nia kliente sira ne’ebé durante ne’e hetan de’it surat tahan, bele asesu ona ba permanente. Ita-nia kliente sira kumpri ona ninia devér, agora oinsá mak sira bele hetan sira-nia diretu,” akresenta governante ne’e.

Antes ne’e, Diretora Nasionál Aprovizionamentu, Lúcia do Rosario hateten konkursu ba xapa matríkula no blanku karta kondusaun iha prosesu finál ona.

Tanba laiha xapa matríkula no karta kondusaun, Diresaun Nasionál Transporte Terrestre (DNTT) sei hanaruk durasaun xapa matríkula no karta kondusaun provizória to’o ida orijinál prodúz ona.

Jornalista: Julia Chatarina

Editór: Xisto Freitas

Notísia Relevante:

Konkursu Ba Blanku Karta Kondusaun no Xapa Matríkula Finál Ona

DNTT Hanaruk Durasaun Blanku Karta Kondusaun no Xapa Matríkula Provizóriu

HAKEREK NO HATÁN

Please enter your comment!
Please enter your name here