Reprezentante Espesiál Governu ba asuntu petróleu, Kay Rala Xanana Gusmão, akompaña hosi Reprezentante VIII Governu Konstitusionál iha Debate Urjénsia Proposta Lei Haat, iha Parlamentu Nasional, kinta, 18 jullu 2019. Imajen Tatoli/António Gonçalves

DILI, 18 jullu 2019 (TATOLI)–Negosiadór Prinsipál ba Delimitasaun Fronteira Marítima, Kay Rala Xanana Gusmão esklarese mina iha kampu Bayu-Undan seidauk maran hanesan saida mak durante ne’e públiku sempre espékula, maibé lisensa ba atividade petrolífera mak sei ramata iha tinan 2022.

“La’ós dehan Bayu-Undan atu maran iha 2022. Lisensa mak atu hotu,” Xanana ko’alia asuntu ne’e hodi responde preokupasaun públiku iha plenária Parlamentu Nasionál (PN), liuhusi debate no votasaun ba Pakote Lejizlativa Tratadu Fronteira Marítima, kinta (18/7).

Xanana esplika, bainhira Tratadu Fronteira Marítima ratifika ona, Timor GAP mak sei jere produsaun iha kampu Bayu-Undan.

Nia hatutan, Timor-Leste presiza iha estratéjia ba investimentu nune’e bele fó retornu oioin ba estadu.

Durante ne’e, Xanana haktuir, produsaun petrolífera iha kampu Laminaria, Austrália sei hetan %10 no Timor-Leste hetan %90, maibé hafoin ratifikasaun tratadu tama iha vigór, Timor-Leste sei hetan %10.

Ho razaun hirak ne’e mak Negosiadór Prinsipál husu atu konsidera alterasaun ba proposta lei númeru 6/V-primeira alterasaun númeru 8/2008, 30 juñu (lei tributária), primeira alterasaun lei númeru 3/2003, 1 jullu, kona-ba Tributasaun ba Kontratante iha Bayu-Undan, tanba lei ne’e sei regula empreza ne’ebé fó serbisu ba traballadór timoroan.

Nune’e mós alterasaun ba proposta lei númeru 7/V kona-ba Rejime Laborál no Migratóriu Espesiál Aplikável ba Projetu Bayu-Undan, ho razaun tanba lei ne’e sei fó tratamentu dignu ba traballadór timoroan sira.

“Durante kompañia sira iha ne’ebá tama sai tuir sira-nia hakarak iha Bayu-Undan, maibé bainhira Tratadu Fronteira Marítima tama iha vigór, ita sei kontrola sira nia dokumentu hotu-hotu,” akresenta Xanana Gusmão.

Jornalista: Evaristo Soares Martins

Editór: Xisto Freitas

 

HAKEREK NO HATÁN

Please enter your comment!
Please enter your name here