iklan

NASIONÁL, DESPORTU, DILI

Manán Café, Choque Hasoru SLB iha Finál

Manán Café, Choque Hasoru SLB iha Finál

Imajen voleiból iha Jináziu Dili. Foto dok. Tatoli

DILI, 18 jullu 2019 (TATOLI)—Klube Choque halakon ekipa Café ho rezultadu (set) 3-2, iha jogu meia finál Tasa ADR União ne’ebé hala’o iha Jináziu, Dili, ohin.

Iha primeira parte, Café konsege mellora set primeiru kontra nia adversáriu Choque ho pontu 25 kontra 21 hodi hatuur rezultadu ba 1-0.  Maibé, iha set segundu, Choque konsege hasa’e espíritu jogu hodi responde set segundu ho pontu 27 kontra 25 hodi muda rezultadu ba 1-1.

Kontinua ba set terseiru, ekipa Choque kontinua mellora pontu kontra Café ho pontu 25 kontra 17 nune’e rezultadu muda ba 2 -1. Hakat ba set kuartu, Café halo blokeia maka’as hodi muda estratéjia jogu hodi aumenta pontu ba nia ekipa iha ne’ebé nia ekipa konsege halo impata jogu ho rezultadu 2 -2 ho pontu 25 kontra 16.

Enkuantu, iha set ikus, vitória hela ho ekipa Choque tanba jogadór hosi ekipa refere halo kontra-atake ne’ebé maka’as to’o ikus hakat duni ba finál bainhira manán ho rezultadu 15-10.

Hosi vitória ne’ebé Choque gaña, lori ekipa refere hakat ba faze finál hodi hasoru SLB atu buka tronfu sé loos mak sai kampiaun ba Tasa ADR União époka ida ne’e.

Derrota ne’ebé Café hetan, ekipa refere sei iha oportunidade hodi hasoru fali ekipa Académica iha loron tuir mai, nune’e bele buka sé loos mak atu sai terseiru lugár ba jogu refere.

Jornalista: Hortençio Sanchez

Editór: Xisto Freitas

iklan
iklan

Leave a Reply

iklan
error: Content is protected !!