Ema ua'in asiste hela Polisia Unidade Maritima (UPM) buka Dario (Danio nai kaduak-red) ne’ebé mout iha área tasi ibun Largo Lecidere Dili, kinta (18/07/2019). Imajen/Eugénio Pereira

DILI, 18 jullu 2019  (TATOLI) –Komunidade ua’in ne’ebé baibain la’o ba mai no halo sira nia atividade iha Largo Lecidere nian, ohin, tuku 14:00 Otl, hakfodak no lunturu haree labarik mane na’in rua; Dario ho Danio (kaduak) ne’ebé mout iha tasi laran area Largo Lecidere nian.

Dario ho Danio nia inan lunturu haree nia oan Dario iis la iha ona tanba mout iha tasi laran area Largo Lecidere nian, kinta (18/07/2019). Imajen/Eugénio Pereira

Akontesimentu ne’e rezulta Danio nia kaduak Dario mate iha tasi laran, hodi halo nia kolega sira nani hamutuk trauma no ta’uk tebes.  Dario, Danio ho nia kolega sira sai husi sira nia uma iha Bidau Masaur, Suku Santana, Postu Administrativu Kristu Rei, Munisípiu Dili, la’o halimar ba tasi ibun hodi ba hariis iha área Largu Lecidere nian.

Bainhira sira hariis hela, derrepente Danio ho Dario mout ba tasi laran, nune’e nia kolega sira seluk halai sai husi tasi laran hodi  hakilar husu ajuda.

Sasin nu’udar mós Jogadór Klube Ponta Leste, Paulo Pinto, hateten, nia la’o halimar hela iha área Largo Lecidere, derrepente labarik balun halai husi tasi ibun hodi husu ho hakilar atu ajuda labarik na’in rua ne’ebé mout hela iha tasi ibun, nune’e nia halai kedas ba tasi laran hodi tama ba tasi laran salva uluk labarik ida (Danio) no tenta atu salva labarik (Dario) maibé buka la hetan, tanba anin makas no laloran tasi merak dada labarik mout tama ba tasi laran.

“Ha’u tuur iha tasi ibun, derrepente labarik balun halai husu ajuda lai, ha’u haree labarik ida mout ona iha tasi laran liman mak sai, ha’u halai kedas tama ba tasi laran salva duni labarik ida (Danio), no sei iha tan labarik ida (Dario), maibé ha’u tama buka atu salva tan maibé buka la hetan ona tanba tasi boot merak no laloran maka’as loos,”  Paulo konta tuir  ba jornalista  iha fatin akontesimentu, Largo Lecidere.

Labarik Danio ne’ebé salva lori kedas ba hala’o tratamentu intensivu iha sala emerjénsia Ospitál Nasionál Guido Valadares (HNGV-sigla portugés).

Hafoin akontesimentu, liu minutu balun Polisia Unidade Marítima (UPM) ho ekipa mós ho ró buka tuir kedas labarik iha tasi laran, hahú husi tuku 14:00 too tuku 17:00 Otl,  mak foin hetan labarik Dario ho kondisaun mate ona.

Aman husi labarik kaduak Dario ho Danio, Júlio Gama no inan Paulina Gama  rona informasaun ne’e sai husi uma ho trauma mai kedas fatin akontesimentu ho tanis no lelir  bainhira akompaña Polisia Unidade Marítima (UPM) buka sira nia oan Dario too hetan mas iis la iha ona.

Dario nia inan ho família tanis tutur liman lelir akompaña Dario nia mate isin ho ekipa Polisia Forensik lori kedas ba HNGV.

Tuir Avó feto husi kaduak na’in rua ne’e, Jacinta da Costa informa iha dadeer labarik rua sei ba eskola hamutuk no baibain fila husi eskola labarik rua sempre fila kedas ba uma no iha uma mós sira rua nunka halimar dook husi uma no ba halimar de’it iha viziñu sira nia uma.

Bainhira rona informasaun nia bei-oan, Danio ho Dario mout iha tasi laran, halo nia neon lakon no trauma boot ho matan been de’it.

Jornalista : Eugénio Pereira 

 Editór      : Francisco Simões

HAKEREK NO HATÁN

Please enter your comment!
Please enter your name here