Prezidente Komisaun Funsaun Públika (KFP), Faustino Cardoso, entrega Relatóriu Anuál 2018 ba Prezidente Repúblika, Francisco Guterres Lú Olo. Imajen Mídia PR

DILI, 18 jullu 2019 (TATOLI)—Prezidente Komisaun Funsaun Públika (KFP), Faustino Cardoso ne’ebé akompaña hosi komisáriu sira, entrega relatóriu anuál KFP tinan 2018 ba Prezidente Repúblika, Francisco Guterres Lú Olo, iha Palásiu Prezidente Nicolau Lobatu, Bairru Pité, Dili, ohin.

Hafoin serimónia entrega, Faustino  esplika, relatóriu anuál ne’e hanesan rezumu hosi implementasaun programa hotu KFP nian, liga ho Planu Asaun Anuál, Planu Estratéjiku KFP no mós planu Estratéjiku Nasionál  2030.

Aleinde de ne’e, iha relatóriu ne’e aprezenta mós kona-bá análiza globál ba situausaun hotu Funsaun Públika  nian.

Faustino hatutan, relatóriu ne’e hetan apresisauan hosi Prezidente Repúblika ne’ebé promete atu fó apoiu másimu ba KFP, hodi bele hadi’a di’ak liu-tan Funsaun Públika iha futuru.

Liu tan ida ne’e, Prezidente Komisaun Funsaun Públika ne’e subliña katak Xefe Estadu preokupa no husu atu KFP haka’as-‘an atu hadi’a atendimentu públiku.

Nia esplika, Prezidente Repúblika apresia no fó apoiu ba inisiativa KFP nian, ne’ebé hakarak atu hadi’a sistema funsionamentu funsaun públika, liu-hosi Dekretu Lei Planeamentu Forsa Traballu ne’ebé oras ne’e dadaun KFP hala’o hela elaborasaun.

Tuir Cardoso, liuhusi Dekretu Lei ne’e KFP sei halo avaliasaun ba asuntu reforma no produtividade servisu, promosaun, avaliasaun dezempeñu, atendimentu públiku no mós buat seluk-tan, ne’ebé bele hadi’a di’ak liu-tan no halo modernizasaun ba Funsaun Públika iha tempu oin.

Jornalista: Cipriano Colo

Editor: Xisto Freitas

HAKEREK NO HATÁN

Please enter your comment!
Please enter your name here