Diretór Planeamentu no Finansa Liga Futeból Amadora (LFA), Adolmado Soares Amaral (liman karuk). Imajen Tatoli/Hortençio Sanchez

DILI, 18 Jullu 2019 (TATOLI)—Diretór Planeamentu no Finansa Liga Futeból Amadora (LFA), Adolmado Soares Amaral, informa jogu segunda volta Primeira Divizaun sei realiza mós iha munisípiu tanba kondisaun Estádiu Munisipál Dili la sufisiente.

Diretór ne’e afirma, loloos jogu primeira volta nia klaran hala’o ona iha munisípiu maibé tanba kestaun orsamentu la sufisiente mak ezekutivu LFA desidi hala’o de’it iha Dili.

“Kona-ba kampu atu utiliza jogu Governu mak iha kompeténsia atu desidi bele uza estádiu ka lae. Maibé, Sekretáriu Estadu Juventude no Desportu (SEJD), Nélio Isaac Sarmento dehan fali LFA mak laiha kapasidade organiza jogu, ha’u hanoin nia (Nélio) intende sala ona karik,” tenik diretór ne’e liuhosi konferénsia ba imprensa ne’ebé hala’o iha salaun Xanana Sport Center, Bairru Formosa, Dili, ohin, hodi hatán ba deklarasaun ne’ebé loron hirak liu-ba SEJD Nélio Isaac Sarmento ko’alia.

Nia afirma, durante époka primeiru to’o agora, LFA hala’o serbisu maka’as tebes hodi finaliza jogu sira ho susesu maski hasoru difikuldade oioin.

“Ami iha duni kapasidade mak realiza jogu hori uluk to’o mai agora ne’e. Ita hatudu ona iha realidade katak Liga Futeból Amadora (LFA) la’o époka haat ona iha Timor,” nia esplika.

Entretantu, pozisaun Governu nian klaru ona katak sei la autoriza jogu semana ida dala haat iha Estádiu Munisipál Dili.  “Governu la autoriza atu joga hala’o hotu iha estádiu Dili mak iha segunda volta ne’e jogu sira ita sei hala’o hotu iha Maliana no Baucau. Klube sira mak tenke dezloka ho osan ne’ebé klube hatún ona katak kada dezlokasaum dolar rihun ida ($1000),” Adolmando esklarese.

“Ami kálkula kuandu jogu hala’o iha munisípiu hosi primeira volta to’o segunda volta, ita tenke gasta dolar rihun neennulu resin-sia ($69), nune’e mak ita-nia proposta haruka ba Sekretaria Estadu Juventude no Desportu rihun atus tolu limanulu ($350) maibé sira hatún tiha mak osan ida viajen nian, ho nune’e mak ita lakohi foti risku—jogu primeira volta ne’e ita hala’o lai iha Dili,” nia subliña.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here