Reprezentante Espesiál Governu ba asuntu petróleu, Kay Rala Xanana Gusmão, akompaña hosi Reprezentante VIII Governu Konstitusionál iha Debate Urjénsia Proposta Lei haat, iha plenária PN, tersa (16/07/2019). Imajen Tatoli/Egas Cristóvão

DILI, 18 jullu 2019 (TATOLI)—Ministru Estadu Prezidénsia Konsellu Ministru no Ministru Petróleu no Rekursu Minerál en-ezersísiu, Hermenegildo Augusto Cabral Pereira hateten liuhosi testu ne’ebé VIII Governu haruka ba Parlamentu Nasionál (PN) hodi hetan ratifikasaun, hatudu kompromisu Timor-Leste hodi garante empreza petrolífera sira ne’ebé opera iha área dezenvolvimentu konjunta (JPDA-sigla inglés).

“Hafoin ratifikasaun no tratadu tama iha vigór, estrutura sira hosi JPDA nia supervizaun no koordenasaun sei ramata, no mós funsaun regulatória hosi supervizaun sira hotu iha área marítima sira pasa ba jurizdisaun eskluziva hosi Timor-Leste nia autoridade nasionál sira,” tenik Hermenegildo ‘Agio’ iha debate jeneralidade ba Proposta Lei no Rezolusaun Governu iha PN, ohin.

Tuir governante ne’e, iha nesesidade hodi prosede ba alterasaun Lei Atividade Petrolífera ho forma hodi hatudu realidade foun ne’e.

“Aleinde adapta, rejime jurídiku ne’ebé aplika ba atividade petrolífera iha Timor-Leste ba ezijénsia sira ne’ebé hetan konsekuénsia hosi atuál estadu hosi indústria nia dezenvolvimentu iha ita-nia nasaun, mós sei  halo kompatível Lei ba Rejime Regulamentár ne’ebé aprova ona ba operasaun sira iha tasi (offshore),” nia akresenta.

Nia esplika, alterasaun hirak ne’e mak hanesan hasai referénsia sira ba rejime hosi Tratadu Tasi Timor no respetivu hosi órgaun regulatóriu sira, hanesan mós regra sira ne’ebé bele aplika bainhira independénsia ba tranzisaun hosi atividade sira ne’ebé la relevante ona.

“Introdusaun konseitu ne’ebé presiza implementa Rejime Espesiál Greater Sunrise nia área foun, halo no regulamenta liuhosi tratadu no reformulasaun konseitu petróleu bruto no operasaun petrolífera sira hodi bele enfrenta situasaun no dúvida sira ne’ebé iha pasadu no prejudika ona Estadu Timor-Leste tanba defisiente iha definisaun,” nia esklarese.

Nune’e mós, nia realsa, introdusaun konseitu Dekretu-Lei hosi implementasaun tratadu hodi kobre diploma legál ne’ebé sei hetan aprovasaun hodi permiti tranzisaun hosi área peskiza no produsaun petrolífera sira, ne’ebé uluk inklui ona iha JPDA no iha jurizdisaun australiana ba jurizdisaun eskluziva hosi Timor-Leste ho tama iha vigór hosi tratadu.

Enkuantu, introdusaun hosi regra ne’ebé destina ba aumenta Timor-Leste nia partisipasaun no fornesedór sira hosi bens no prestadór serbisu timoroan iha atividade  petrolífera sira, halo aliñamentu hosi lei nia testu ho lejizlasaun ne’ebé prodúz ona ba área eskluziva hosi Timor-Leste, hanesan mós sira-ne’ebé relasiona ho utilizasaun hosi baze lojístika Suai no infraestrutura asosiada.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here