Negosiadór Prinsipál, Xanana Gusmão, bainhira aprezenta alterasaun Lei Haat iha Parlamentu Nasionál. Imajen dok. Tatoli

DILI, 18 jullu 2019 (TATOLI)—Ministru Estadu Prezidénsia Konsellu Ministru no Ministru Petróleu no Rekursu Minerál en-ezersísiu, Hermenegildo Augusto Cabral Pereira hateten iha introdusaun Alterasaun Lei Haat ne’e sai hanesan importánsia boot, tanba aplikasaun nórma fizkál ne’ebé vigór iha Timor-Leste.

“Atu bele kumpri kompromisu ne’e, ita propoin, nomeadamente, hala’o ho ajusta hosi taxa tributasaun ne’ebé destina hodi asegura manutensaun hosi kondisaun ekivalente sira hodi bele aplika ba empreza afetada sira iha Tasi Timor, molok Tratadu Tasi Timor tama iha vigór,” nia tenik durante diskusaun jeneralidade ba pakote lejizlativa Tratadu Fronteira Marítima iha plenária, Parlamentu Nasionál (PN), kinta ne’e.

Nia dehan, ho razaun ne’e hatama ba Lei Tributária nórma sira ne’ebé vigora iha ordenamentu jurídiku tanba halo parte hosi Tasi Timor ninia tratadu.

“Loloos sira ne’ebé relasiona ho izensaun aduaneira no ba aspetu internasionál sira hosi impostu kona-ba rendimentu, sei prevee adosaun hosi prinsípiu ne’ebé aseita iha nível internasionál kona-ba matéria ne’e, hanesan define ona hosi OCDE-Organização para a Cooperação e Desenvolvimento, iha matéria kona-ba alokasaun hosi rendimentu ba jurizdisaun fizkál hosi Timor-Leste,” nia katak.

Nune’e, nia akresenta, atu absorve realidade foun ne’ebé sei permiti dezenvolve rekursu sira hosi Tasi Timor ho maneira ekonómika no ambientalmente sustentável ba Timor-Leste, hanesan mós promove investimentu no dezenvolvimentu ba tempu naruk hosi nasaun, iha nesesidade hodi halo ajusta ba lejizlasaun fiskál nasionál, liuliu ba lei sira.

Lei hirak ne’e mak hanesan Lei N.º 8/2008, hosi 30 juñu, ne’ebé aprova Lei Tributária, Lei N.º 3/2003, hosi 1 jullu, kona-ba Tributasaun hosi Kontratante sira hosi Bayu-Undan, no Lei N.º 4/2003, hosi 1 jullu, kona-ba Dezenvolvimentu hosi Petróleu iha Tasi Timor (Estabilidade Tributária).

“Proposta Lei ne’ebé aprezenta ba Parlamentu Nasionál i nu’udar objetivu introdúz ba lejizlasaun fiskál nasionál ho adaptasaun ne’ebé presiza hodi permite mantein kondisaun ekivalente kona-ba rejime fiskál ne’ebé bele aplika ba área ne’ebé pasa ba jurizdisaun eskluziva hosi Timor-Leste,” nia subliña.

Nia dehan tan, ba alterasaun lei fiskál sira ne’ebé refere pretende liliu adaptasaun hosi referénsia sira ba rejime hosi Tratadu Tasi Timor no hosi respetivu órgaun regulatóriu sira, introdusaun hosi konseitu sira no alterasaun ne’ebé presiza ba implementasaun hositratadu foun.

Nune’e mós, introdusaun hosi taxa espesiál sira hosi tributasaun ne’ebé destina hodi aplika ba área hosi kontratu ne’ebé pasa ba jurizdisaun eskluziva hosi Timor-Leste no introdusaun  hosi nórma sira-ne’ebé relasiona ho aspetu aduaneiru sira no hosi tributasaun internasionál.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here