DILI, 18 jullu 2019 (TATOLI)—Estadu liuhusi Embaixada Timor-Leste (TL) iha Indonézia hola responsabilidade hodi fasilita transladasaun mate isin João Bosco Batista Colo Batan mai Timor Leste.

Embaixadór TL ba Indonézia, Alberto X.P. Carlos rasik, horisehik, iha  Ospitál  Bhayangkara iha  Jogjakarta, asina ona  termu entrega mate isin Bosco, no ohin dadeer,  Embaixadór Alberto Carlos, fila mai Jakarta hodi prosesa dokumentu matebian Bosco nian no selu kaixaun, inklui sosa tiketi aviaun  hodi fasilita transladasaun mate isin Bosco nian hosi Jogjakarta mai Timor-Leste.

Embaixadór TL ba Indonézia, Alberto X. P. Carlos, haree mate isin Bosco iha Ospitál Bhayangkara iha Jogjakarta, kuarta (17/07/2019). Imajen Embaixada TL iha Indonézia

“Horisehik lorokraik, kuarta (17/07/2019), ha’u ba mortuáriu RS Bhayangkara iha Jogjakarta, haree mate isin  no ha’u asina ona termu entrega mate isin mai Embaixada.  Ho nune’e, Estadu liuhusi Embaixada Timor nian iha Indonézia maka sei fasilita transladasaun ba TL,” informa Embaixadór Alberto X. P. Carlos, ohin, ba Agência TATOLI liuhusi komunikasaun mensajen rede sosiál WhatsApp.

João Bosco Batista Colo Batan, ho naran bolu Bosco hosi Aldeia Masin, Suku Costa, Sub-rejiaun Pante Makassar, Rejiaun Administrativa Espesiál Oé-Cusse Ambeno (RAEOA), lakon iha Jogjakarta iha loron 2 fulan ne’e.

Bosco iha Jogjakarta hela iha Jalan Maguwo 0, Banguntapan, Bantul, rumah 161, RT 24 no eskola iha Sekolah Tinggi Teknik Adisucipto (STTA) Jogyakarta, Departemen Tenkik Industri Penerbangan, Semestre 2, no tuir planu iha loron 17 fulan ne’e Bosco sei hala’o ezame semestre (TAS).

Informasaun hosi João Meko, nu’udar advogadu ne’ebé hetan fiar hosi família Bosco nian atu akompaña prosesu ne’e  relata katak, mate isin ne’ebé komunidade Magetan, Java Leste hetan ne’e identifikadu ona hosi Polísia Jogjakarta katak, mate isin ne’e estudante Timoroan ho naran João Bosco Batista Colo Batan, ne’ebé ema lori lakon (culik) iha loron 2 jullu, foin lalais ne’e.

Jornalista: Francisco Simões

Editór: Xisto Freitas

Notísia  Relevante : Posibilidade, Aban Mate Isin Bosco To’o Timor

HAKEREK NO HATÁN

Please enter your comment!
Please enter your name here