Diretora Jerál EDTL, Arlinda Miranda Manetelo. Imajen/MOP.

DILI, 18 jullu 2019 (TATOLI)–Diretora Jerál Eletrisidade Timor-Leste (EDTL), Arlinda Miranda Manetelo, ohin, informa inspesaun ne’ebé EDTL halo iha Dili laran deteta katak konsumidór enerjia elétrika balun kontinua dada ahi ilegál.

“Ami halo inspesaun iha kapitál Dili, iha fulan jullu ne’e deteta umakain 80 maka dada ahi ilegál”, Arlinda Miranda ba Ajénsia Tatoli, iha nia servisu fatin, Kaikoli.

Diretora ne’e rekoñese katak iha 2017 to’o 2018, EDTL la konsege halo inspesaun tanba impase polítika ne’ebé rezulta problema finanseiru, enkuantu iha jullu ne’e nia laran foin halo inspesaun, maibé konsege deteta kliente sira kontinua dada ahi ilegál.

“Ita-nia ekipa EDTL deteta, tesi no haruka kliente ka konsumidór ne’e mai selu tuir prejuízu ne’ebé Estadu lakon ona”, salienta.

Hafoin ne’e, ekipa EDTL kontinua dada filafali ahi ne’ebé antes ne’e konsumidór sira halo ilegál, atu nune’e parte EDTL bele kontrola kuandu hetan sirkuitu ruma. Tanba ne’e, tuir dekretu lei númeru 33/2016, 17 agostu, ne’ebé regula ona enerjia elétrika ho tarefa.

Nia adianta katak EDTL sei kontinua halo inspesaun ba kada umakain sira atu garante konsumidór sira-nia asesu ba eletrisidade no la liuhosi dalan ilegál, atu nune’e hothotu iha direitu hanesan hodi asesu ba eletrisidade.

Kliente EDTL 30.000 Dada Eletrisidade Ilegál Tanba Seidauk Iha Kontadór Pre-Pagu

Jornalista : Florêncio M. Ximenes

Editora : Maria Auxiliadora 

HAKEREK NO HATÁN

Please enter your comment!
Please enter your name here