DILI, 18 jullu 2019 (TATOLI)-Diretór Nasionál Rejistu no Notariadu (DNRN), Ministériu Justisa, João Fernando Martins Borges, hateten, sei uza sistema integradu hodi rejistu sertidaun moris (RDTL) ba labarik ho tinan lima mai kraik, atu nune’e, bainhira rejista iha suku dadus ne’e bele rejista kedas iha nasionál.
“Kuandu ita rejista iha suku no postu administrativu dadus sira mai kedas iha servidór iha sentrál tanba sistema online,” informa João Martins ba Ajénsia TATOLI, iha nia servisu fatin, Bebora, Dili, kuarta (17/07/2019).
Diretór ne’e hateten, DNRN servisu hamutuk ho UNICEF halo rejista ba labarik porsentu 40 tuir sensu 2015 ne’ebé seidauk hetan sertidaun RDTL.
Rejistu moris ne’e sei hala’o iha tinan 2019 depois UNICEF fornese ona ekipamentu hanesan Komputadór, Scanner Printer no Virtual Private Networking (VPN) .
Tuir planu DRNR no UNICEF sei rejista labarik hahú hosi Munisípiu Lautem, Baucau, Viqueque, Manatuto, Aileu, Ainaro no seluk tan.
Enkuantu ba munisípiu parte Oeste hanesan Bobonaro no Rejiaun Administrativu Espesiál Oe-Cusse Ambeno (RAEOA) sei iha prosesu formasaun lideransa komunitáriu kona-ba prosedimentu legais, lei ba rejistu sivíl no oinsá prienxe formuláriu rejistu hodi entrega ba ekipa konservatóriu DNRN.
Notísia Relevante : DJE Lansa Relatóriu ODS ba Labarik no Avaliasaun ba Rejistu Moris
Jornalista : Agapito dos Santos
Editór : Francisco Simões
