Enkontru entre estrutura CDTL no dirijente Federasaun 12. Imajen Tatoli/Hortençio Sanchez

DILI, 18 jullu 2019 (TATOLI)—Konfederasaun Desportiva Timor-Leste (CDTL-sigla Portugés) hanesan órgaun ida ne’ebé fó mahon ba federasaun hotu iha Timor-Leste. Tanba ne’e, ohin, CDTL hala’o soru-mutu ho federasaun 12 hodi ko’alia kona-ba preparasaun atu ba partisipa Sea Games ne’ebé sei hala’o iha Manila-Filipina, novembru mai ne’e.

“Ami kle’ur ona la halo enkontru. Ohin ami hamutuk ho federasaun 12 ko’alia oinsá preparasaun ba Sea Games nian, oinsá mak situasaun sira ne’ebé iha federasaun sira halo preparasaun tanba hela de’it fulan lima ona—tempu ne’e badak loos,” dehan Prezidente CDTL, Afrânio Xavier Amaral ba jornalista iha salaun CDTL, Caicoli, Dili.

Nia esplika, bainhira federasaun haruka atleta partisipa iha eventu internasionál refere tenke haree mós ba kondisaun atleta ida-idak nian.

Nia hatutan, atu lori atleta partisipa iha eventu internasionál, parte hotu tenke túr hamutuk hodi halo diskusaun entre kada federasaun hafoin bele desidi loloos atleta hira mak sei partisipa.

“Kritéria ba atleta sira atu ba ka la ba ne’e iha. Se nia ba barak mak la hatudu prestasaun mós ida ne’e hanoin ladún di’ak. Atleta bele ba maibé tenke kualidade duni nune’e bainhira hala’o jogu iha kampu ne’e bele lakon ba mós iha dignidade,” tenik Afrânio.

Federasaun 12 ne’ebé hala’o reuniaun ho CDTL mak hanesan Fiteból, Tiru, Atletizmu, Siklizmu, Silat, Taekwondo, Sadres, Boxe, Natasaun, Feratelizmu, Karatedo no Voleiból.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here