Deputadu Partidu Demokrátiku (PD), Adriano do Nascimento. Imajen TATOLI/António Goncalves

DILI, 18 jullu 2019 (TATOLI)—Deputadu Bankada Opozisaun Partidu Demokrátiku (PD), Adriano do Nascimento, preokupa  kompañia estatál Timor GAP, Ep, ne’ebé sei foti osan diretamente hosi Fundu Petróleu bainhira altera proposta lei númeru 4/V-segunda alterasaun númeru 13/2005, 2 setembru, kona-ba Lei Fundu Petrolífera.

Hosi Proposta lei ne’e, Adriano kestiona artigu 15-A ne’ebé ko’alia kona-ba investimentu iha operasaun petrolífera.

“Artigu 15 alínea A númeru 1 bele fó biban ba kompañia Timor GAP, Ep, hodi foti Fundu Petróleu diretamente. Loloos ne’e, osan fundu mina-rai foti hosi orsamentu jerál Estadu (OJE) no jestaun finanseira,” deputadu ne’e kestiona durante diskusaun no votasaun iha plenária Parlamentu Nasionál (PN), liuhusi debate no votasaun ba Pakote Lejizlativa Tratadu Fronteira Marítima, kinta (18/7).

Nia realsa, orsamentu hotu-hotu tenke liuhosi PN, hafoin promulgasaun hosi Prezidente Repúblika (PR) no Tribunál Rekursu mak fó vistu prévia. “Fundu Petrolíferu só foti liuhosi odamatan úniku mak orsamentu jerál Estadu,” nia afirma.

“Seráke Lei Fundu Petrolíferu artigu 15 ida ne’e la’ós kestaun nasionál ne’ebé laiha obrigasaun internasionál, tanba iha Lei Fundu Petrolíferu hateten katak ita atu hasai osan só odamatan ida de’it, maibé polítika internál Timor-Leste nian agora ita hakarak kria odamatan rua, hosi Parlamentu Nasionál no ida tan hosi Timor GAP, Ep, liuhosi polítika investimentu,” Adriano esplika.

Tuir Adriano, bainhira la adita sai obstákulu legál polítika hodi fasilita direitu internasionál ligadu ho Fronteira Marítima. Nia mós preokupa direitu internasionál hanesan obrigasaun Timor-Leste nian ka polítika internál.

Hatán ba preokupasaun ne’e, Xefe Negosiadór Prinsipál ba Delimitasaun Fronteira Marítima, Kay Rala Xanana Gusmão, rejeita deklarasaun ne’ebé dehan foti Fundu Petróleu liuhosi odamatan rua.

“Ita-boot temi orsamentu jerál Estadu oin seluk, maibé orsamentu ne’e hanesan despeza pura katak bainhira osan la tama ona, polítika investimentu ne’e sei fila. Ita fó fiar ba Timor GAP investe tuir artigu 15 ne’e mak osan sei fila,” Xanana responde preokupasaun Adriano.

Tuir Xanana, liafuan investimentu Fundu Petróleu nian só iha sentidu bainhira tau osan no fó retornu.

“Investimentu iha operasaun petrolífera tuir ha’u-atan nia hanoin importante tanba ita partisipa investe osan no osan ne’e sei fila ba Fundu Petróleu,” Xanana esplika.

Jornalista: Evaristo Soares Martins

 Editór: Xisto Freitas

1 KOMENTÁRIU

  1. Tamba sa maka pakote Lei ne mai la le’e didiak tia lai hodi sai perkupasaun hodi nune husu esklaresimentu ba governo ou chefe negosiador ho nia ekipa esplika.
    Desijaun liu ona hosi votasaun iha plenaria, itabo’ot sira nia bankada afavor.
    Liu tia mak perkupa!!!!
    Ada apa di balik politik anda???
    Nasi sudah jadi bubur.
    Agora hein deit ona desijaun hosi PR.

HAKEREK NO HATÁN

Please enter your comment!
Please enter your name here