Reprezentante Espesiál Governu ba asuntu petróleu, Kay Rala Xanana Gusmão, akompaña hosi Reprezentante VIII Governu Konstitusionál iha Debate Urjénsia Proposta Lei Haat, iha plenária PN, kinta, (18/07/2019). Imajen Tatoli/Egas Cristóvão

DILI, 18 jullu 2019 (TATOLI)–Bankada Opozisaun FRETILIN, liuhosi sesaun debate jeneralidade ba Pakote Lejizlativa Tratadu Fronteira Marítima, vota kontra proposta haat hosi pakote ne’e, ho razaun hakarak fó oportunidade ba diálogu.

“Bankada FRETILIN vota kontra atu dala ida tan, fó fatin no loke dalan ba diálogu entre lideransa molok tama ba votasaun finál globál,” refere nota komunikadu ne’ebé Agência Tatoli asesu hosi bankada FRETILIN, kinta (18/7).

Nota ne’e esplika, preokupasaun sira ne’e, Bankada FRETILIN aprezenta ona iha semana ida ne’e nia laran, tantu deklarasaun ba imprensa no intervensaun sira durante audisaun no debate jeneralidade.

“Maski nune’e, preokupasaun sira ne’e sei mantein nafatin tanba seidauk hetan esplikasaun klaru ba dúvida sira ne’ebé Bankada FRETILIN foti,” sita komunikadu ne’e.

Bankada opozisaun ne’e sei defende nafatin katak prosesu ne’e tenki la’o liuhosi prosesu diálogu no konsulta ne’ebé kle’an ho parte relevante sira hotu, hodi garante katak asegura duni interese nasionál.

“Bankada Parlamentár FRETILIN hakarak loke oportunidade atu bele iha diálogu entre lideransa no parte relevante sira hotu, atu ita hetan klarifiksaun no konsensu bazeia ba interese nasionál,” afirma bankada partidu istóriku ne’e.

Entretantu, proposta lei haat aprovadu ho votu maioria iha jeneralidade, maibé opozisaun Bankada FRETILIN vota kontra.

Proposta lei haat ne’ebé hetan ona aprovasaun iha jeneralidade mak hanesan Lei númeru 5/V-segunda alterasaun lei 9/2015, 3 agostu, kona-ba Lei Fundu Petrolífera, aprova ho votu a-favór 41, kontra 23 no abstensaun 1.

Proposta lei númeru 6/V- primeira alterasaun lei númeru 8/2008, 30 juñu kona-ba Lei Tributária no primeira alterasaun lei númeru 3/2003, 1 jullu, kona-ba Tributasaun Kontrante ba Bayu Undan, aprova ho votu a-favór 41, kontra 23, no abstensaun 1.

Nune’e mós primeira alterasaun lei númeru 4/2003, 1 jullu kona-ba Dezenvolvimentu Petróleu iha Tasi Timor (estabilidade tributária); segunda alterasaun lei númeru 13/2005, 2 setembru- Lei Atividade Petrolífera, aprova ho votu a-favór 41, kontra 23 no abstensaun 1.

Ikus liu, proposta númeru 7/V-Rejime Laborál no Migratóriu Espesiál Aplikável ba Projetu Bayu Undan, aprova ho votu a-favór 42, kontra 23 no abstensaun 0.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here