Reprezentante Espesiál Governu ba asuntu petróleu, Kay Rala Xanana Gusmão. Imajen Tatoli/Egas Cristóvão

DILI, 17 jullu 2019 (TATOLI)Negosiadór Prinsipál ba Delimitasaun Fronteira Marítima, Kay Rala Xanana Gusmão, hateten bainhira halo negosiasaun atu konvense Austrália kona-ba disputa Fronteira Marítima la’ós fásil, tanba Austrália sai tiha ona konvensaun internasionál United Nations Convention on the Law of the Sea (UNCLOS), tanba ne’e konvenaun  labele kesi.

“La’ós fásil! Tanba labele bolu Austrália ba iha ne’ebá. Ita hetan tiha dalan ida konsiliasaun obrigatória ne’e hodi obriga Austrália tuur iha ita nia sorin. Buat ida kompulsória mak obriga Austrália tuur iha konsiliasaun ne’e. Kompulsória ne’e katak hakarak ka lakohi Austrália tenke tuur iha ne’ebá,’’ tenik Xanana durante audisaun entre Governu ho Komisaun B, C no D iha plenária Parlamentu Nasionál (PN), kuarta ne’e, relasiona ho intervensaun hosi deputadu Bankada opozisaun FRETILIN ne’ebé husu esplikasaun klaru kona-ba prosesu tomak, hahú hosi negosiasaun ba Fronteira Marítima to’o tama prosesu dezenvolvimentu iha kampu Greater Sunrise.

Nune’e, Xanana informa, oras ne’e akordu ba Fronteira Marítima loos ona, maibé atu luta dada kadoras mai Timor-Leste presiza pakote lei hirak ne’ebé iha ligasaun no tenke altera.

“Ita iha objetivu rua. Ida kona-ba área Delimitasaun Fronteira Marítima entre Timor-Leste ho Austrália no ida seluk mak estabelesimentu Rejime Espesiál ba kampu Greater Sunrise. Ida ne’e importante ba prosesu dezenvolvimentu Greater Sunrise iha futuru,” nia esplika.

“Temi Greater Sunrise, tanba ida ne’e konsiliasaun, entaun konsiliasaun ne’e negosiasaun rona hotu entre parte rua hodi negósia, nune’e parte rua hetan konkluzaun ida ho solusaun ida bele benefísia parte rua,” nia akresenta.

Xanana dehan, kona-ba objetivu hosi Rejime Espesiál iha kampu Greater Sunrise, prosesu dezenvolvimentu, esplorasaun no jestaun konjuntu iha petróliu iha kampu ne’e, sei benefísia parte Timor-Leste ho Austrália.

Entretantu, iha proposta rezolusaun kona-ba ratifikasaun tratadu entre Timor-Leste ho Austrália, ne’ebé estabelese respetiva Fronteira Marítima iha Tasi Timor, hateten bainhira tratadu ne’e tama iha vigór, hamosu objetivu Rejime Espesiál ba Greater Sunrise, katak petróliu ne’ebé prodúz iha kampu Greater Sunrise sei benefísia parte rua.

Tuir akordu ne’ebé asina iha Nova Iorke kona-ba propriedade ba reseita petróliu iha Greater  Sunrise iha esplorasaun upstream hateten, Timor-Leste hetan %70 no Austrália hetan %30, maibé dada ba Austrália, Timor-Leste hetan 80 % no Austrália hetan 20% .

Nia hatutan, bainhira prosesu dezenvolvimentu hahú sei hamosu entidade regulatória hodi halo regulamentasaun no administrasaun ba Rejime Espesiál ba Greater Sunrise ne’ebé kompostu hosi autoridade dezignada ho Konsellu Supervizaun tuir artigu 5 iha proposta rezolusaun ba tratadu Fronteira Marítima.

Autoridade dezignada rasik sei responsável kona-ba regulasaun no jestaun diária iha atividade petrolífera iha área Rejime Espesiál Greater Sunrise nian no sei reprezenta Timor-Leste ho Austrália.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here