Tribunal Distritál Dili.

DILI, 17 jullu 2019 (TATOLI) – Tribunal Distritál Dili (TDD), kontinua promove lian ofisiál hanesan Tetun ho Portugés iha audiénsia julgamentu.

“Ita hatene katak ita nia lingua ofisiál mak Portugés ho Tetun, iha Tribunal, ita uza lingua rua nee hotu, maibé ita la uza lingua sira seluk,” hateten  Juis Administradór TDD, José Maria de Araújo, ohin, ba jornalista sira iha Tribunal Distritál Dili.

Nia hatutan, juis sira ba iha audiénsia julgamentu sempre uza Tetun, relasiona ho ema sira ne’ebé mak tuir julgamentu. Maibé, kuandu juis ida mak hakerek despaxu ka desizaun leitura akórdaun hot-hotu ho lian Portugés.

Nia esplika, durante nee mós juis sira hetan kualkér despaxu ka leitura sira hot-hotu ho Portugés, laiha ida mak Tetun.

Nia tenik, juis sira nee, barak mak hasai sira nia lisensiatura iha Indonézia, maibé depois tuir kursu iha Sentru Formasaun Jurídiku   hatudu iha progresu boot no espera bele fasilita tan serbisu Tribunal nian.

Hatán kona ba arguido, vítima ka testemuña ne’ebé mak ko’alia lian seluk, Tribunal buka tradutór/a hodi tradús husi ema seluk mak hatene lian sira nee.

Iha sorin seluk, Juiza Edite Palmira hateten,  ba arguido, vítima no testemuña sira ne’ebé mak hakarak fó nia depoimentu iha Tribunal tenke ko’alia lian Tetun ka Portugés tanba lian ofisiál ne’ebé prevee ona iha konstituisaun, la’ós ko’alia fali lian Indonézia.

 Jornalista   : Domingos Piedade Freitas

Editór          : Francisco Simões

HAKEREK NO HATÁN

Please enter your comment!
Please enter your name here