Ministru Justisa, Manuel Cárceres da Costa. Imajen/Antonio Goncalves

DILI, 17 jullu 2019 (TATOLI)—Ministru Justisa, Manuel Cárceres da Costa, informa iha tinan 2020 Governu sei kria Komisaun Terra no Propriedade atu halo estudu kona-ba rejistrasaun dadus rai.

“Komisaun Terra no Propriedade ne’e mai atu estuda, sira ne’ebé laiha disputa ne’e ita bele kria ona mekanizmu no lei hodi fó ona sertifikadu na’in ba rai ba ita nia sidadaun sira. Sira ne’ebé sei iha disputa laran komisaun ne’e iha kompeténsia atu rezolve tuir mekanizmu tradisionál ka tuir ita-nia kustumi hodi evita ita-nia maluk hadau malu rai hodi to’o Tribunál,” tenik Ministru Cárceres hafoin relata serbisu ministériu ba Primeiru-Ministru (PM), Taur Matan Ruak, iha Palásiu Governu, kuarta ne’e.

Tuir nia, Dekretu-Lei ida mak Konsellu Ministru aprova ona no hein atu sai iha Jornál Repúblika atu harii Komisaun Terra no Propriedade.

Governante ne’e informa, kona-ba Serbisu Nasionál Kadastru (SNC-sigla portugés), to’o agora rejista ona parsela hamutuk 300.000 resin no parsela hirak ne’e iha %8 mak sei iha disputa no sei pendente.

“Agora ami iha ezbosu lei kona-ba kadastru, lei kona-ba rejistu prediál no Dekretu-Lei hamutuk iha diploma 16 hodi lori mai Konsellu Ministru atu aprova no lori ba Parlamentu Nasionál (PN). Hafoin ne’e, sei lori tan ba Prezidente Repúblika (PR) atu hetan promulgasaun. Lei sira ne’e atu implementa rezultadu serbisu SNC no fó títulu ba sidadaun sira,” Cárceres esplika.

Nune’e mós, nia dehan, kona-ba ezbosu Lei Organizasaun Ordenamentu Territóriu iha ona no agora iha lei rai (Lei nú.13/2017) ne’ebé tama iha vigór ona, maibé atu implementa Lei nú.13/2017 presiza lei tolu ka haat, Dekretu-Lei no Diploma Ministeriál lubuk ida para bele implemeta lei sira ne’e.

Nia haktuir, enkontru ohin ho Xefe Governu koa’lia mós kona-ba oinsá mak bele hadi’a sidade Dili. “Halo ordenamentu territóriu ba sidade Díli tuir ita-nia  lejizlasaun ne’ebé mak iha ona,” Cárceres haklaken.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here