Suspeitu na'in lima ne'ebé taa membru F-FDTL iha Pantai Kelapa, Estasaun Konbustivel Nagarjo nia oin, domingu kalan (14/07/2019), ohin, submete ba primeiru interrogatóriu iha Tribunál Distritál Dili. Imajen/Domingos Piedade Freitas

DILI, 17 jullu 2019 (TATOLI) – Tribunál Distritál Dili (TDD),  ohin, loke prosesu primeiru interrogatóriu ba suspeitu na’in lima (5) ne’ebé taa membru FALINTIL-Forsa Defeza Timor Leste (F-FDTL), Abilio Babo, domingu kalan (14/07/2019), iha Pantai Kelapa, parte Estasaun Kombustivel Nagarjo nia oin.

Suspeitu sira ne’ebé taa membru F-FDTL iha Pantai Kelapa, Estasaun Kombustivel Nagajor nia oin. Imajen/Domingos Piedade Freitas

Defensor Públiku, Estaquio Guterres, ne’ebé fó asisténsia legál ba suspeitu sira hateten, dala ruma nia kliente sira hetan aprezentasaun periódika tanba sei iha faze deskonfia hela.

Tuir kronolojia akontesimentu, ne’ebé Jornalista sira asesu husi ofisial Polisia sira, katak, iha momentu ne’ebá vítima uza ropa sivíl liuhusi area tasi ibun Pantai Kelapa atu ba nia uma. To’o iha Estasaun Kombustivel Nagarjo nia oin, nia rona telefone lian no nia para hasai kapasete hodi simu telefone, derrepente de’it ema taa nia iha parte hasan hodi monu kedas ba rai.

Suspeitu sira mós komete krime ho kategoria fragante delitu, tanba momentu polisia sira halo kapturasaun hetan objetu hanesan, katana rua, tudik ida, rama ambon inklui mós sasán atributu grupu arte marsiál ida nian ne’ebé Estadu suspende tiha ona ho Lei.

Ministériu Públiku hanesan na’in ba asaun Penal, promove suspeitu na’in lima mós ho krime arma branka no krime tentativa omisídiu grave.

Enkuantu, lala’ok ba prosesu nee sei taka ba públiku atu asesu direita tanba, tribunal sei kontinua julga iha  Kinta (18/07/2019), tuku 09:00 OTL, hodi rona alegasaun husi Ministériu Públiku.

Audiénsia julgamentu primeira interrogatóriu nee prezide husi juis, Jose Maria de Araújo, Ministériu Públiku reprezenta Prokuradóra Ivonia Guterres no arguido sira hetan Asisténsia legal hosi Defensór Públiku, Eustáquio Guterres, akompaña mós advogadu husi Instituisaun Jurídika Timor-Leste (IJTL), Marito da Silva.

Jornalista      : Domingos Piedade Freitas

Editór              : Francisco Simões

HAKEREK NO HATÁN

Please enter your comment!
Please enter your name here