DILI, 17 jullu 2019 (TATOLI)–Negosiadór Prinsipál ba Delimitasaun Frontreira Marítima, Kay Rala Xanana Gusmão, hateten setór agrikultura no turizmu hanesan baze ba dezenvolvimentu ekonómiku iha futuru.
“Ita book uluk minarai lai hafoin dudu agrikultura no turizmu nu’udar baze ba dezenvolvimentu ekonómiku ba ita-nia rai,” tenik Xanana iha audisaun konjunta komisaun iha sala plenária, kuarta ne’e.
Tuir Xanana, atu dezenvolve setór produtivu hirak ne’e hahú uluk husi petrolíferu sira iha Tasi Timor, tanba oras ne’e Timor-Leste hetan reseita boot liu hosi fundu petrolíferu.
Nia akresenta, tuir Planu Estratéjiku Dezenvolvimentu Nasionál (PEDN) 2011-2030, katak fonte prinsipál atu dudu prosesu dezenvolvimentu hotu-hotu tenke investe uluk ba atividade petrolífera hafoin dezenvolve setór sira seluk.
Xanana informa, bainhira Tratadu Fronteira Marítima ratifika ona, sei hahú foka ba prosesu dezenvolvimentu kampu Greater Sunrise, tanba Timor-Leste sei hetan reseita boot liuhosi kampu ne’e.
Tuir nia, infraestrutura bázika iha projetu Tasi Mane hanesan refinária Betano no Liquefied Natural Gas (LNG) Beaço tenke la’o, nune’e bainhira dada kadoras mai infraestrutura hirak ne’e bele fasilita no bainhira planu hirak ne’e la’o, Timor-Leste sei defini potensialidade ne’ebé trasa ona iha PEDN.
Jornalista: Evaristo Soares Martins
Editór: Xisto Freitas
