Diplomata timoroan, Dionísio Babo Soares kaer liman ho Sekretáriu Jerál Organizasaun Nasaun Unida, António Guterres. Foto: asesu iha FB Ministru Dionísio Babo Soares

DILI, 17 jullu 2019 (TATOLI)-Sekretáriu Jerál Organizasaun Nasaun Unida (ONU), António Guterres, sei haruka nia reprezentante hodi partisipa komemorasaun tinan 20 Konsulta Populár no mós tinan 20 ba prezensa forsa manutensaun pás  (INTERFET-sigla Inglés) mai Timor Leste (30 Agosto 1999-30 Agosto 2019).

“Sekretáriu Jerál ONU labele mai  komemorasaun dia 30 de Agosto, maibé sei haruka reprezentante ida mai,” informa Ministru Negósiu Estranjeiru no Kooperasaun (MNEK), Dionísio Babo Soares via rede sosiál ba Ajénsia TATOLI, kuarta (17/07/2019).

Governante ne´e haktuir, Eis-xefe governu Portugés, António Guterres hanesan belun di’ak Timor Leste nian akompaña situasaun polítika iha Timor-Leste no espera katak diferensa polítika labele hamate progresu liuliu dezenvolvimentu nasaun ne´ebé foin moris no sai ezemplu ba mundu.

“Uluk nu´udar Primeiru-Ministru Portugal, nia empeña maka´as iha dezenvolvimentu polítiku Timór nian no kontribui maka´as ba prosesu inísiu durante prosesu ba independénsia”.

“Tanba ne´e nia espera katak Timor-Leste ne´ebé durante ne´e sai nu´udar sasukat susesu ONU nian, labele monu ba dalan sala, maibé tenke hadi´a aan hodi hasai povu husi susar no ki´ak,” haktuir tan diplomata timoroan ne´e.

Tuir kronolojia Facebook Ministru Dionísio Babo nian ne’ebé TATOLI observa, hakerek katak nu´udar onra ida tanba simu husi António Guterres, Sekretáriu Jerál Nasaun Unida iha marjen reuniaun Forum Polítiku Nivel Altu nian kona-ba dezenvolvimentu sustentável.

“Ami ko´alia kona-ba kestaun barak liuliu kona-ba dezenvolvimentu polítiku no ekonómiku ba nivel nasionál no internasionál. Situasaun polítika Timor-Leste iha tinan tolu ikus ne´e no mós ko´alia ho forma kama ‘an,” diplomata timoroan ne´e hakerek iha nia kronolojia FB.

“Ho laran ksolok ko´alia ho ema ne´ebé iha koñesimentu luan kona-ba Timor-Leste ne´ebé mak sempre akompaña ho besik eventu sira iha ita-nia rain,” hateten tan Ministru Dionísio Babo Soares.

Notísia relevante: https://web.facebook.com/DionisioBaboSoares/

Jornalista          : Rafy Belo

Editór                : Francisco Simões

 

HAKEREK NO HATÁN

Please enter your comment!
Please enter your name here